Հայաստանի բոլոր դպրոցներում Ցեղասպանության թեմայով բաց դասի անցկացումը համահայկական պատմական իրադարձություն է: Այս մասին այսօր՝ ապրիլի 17-ին, Երեւանի Մանուկ Աբեղյանի անվան ավագ դպրոցում լրագրողների հետ զրույցում ասաց ՀՀ Կրթության եւ գիտության նախարար Արմեն Աշոտյանը, որն անձամբ էր այսօր դպրոցում վարում բաց դասը:
«Սա վերջին միջոցառումը չի լինելու դպրոցներում, դրանք շարունակվելու են նաեւ տարվա ընթացքում: Այսօր բաց դասի ընթացքում կխոսեմ Հայոց ցեղասպանության 100-րդ տարելիցի համահայկական հռչակագրի նշանակության մասին եւ կպատասխանեմ աշակերտների հարցերին: Տարվա ընթացքում նախատեսվում են նաեւ այլ ժողովուրդների ցեղասպանություններին վերաբերող բաց դասերի անցկացում»,-ասաց Արմեն Աշոտյանը:
Հայոց ցեղասպանության 100-րդ տարելիցի համահայկական հռչակագիրը, ըստ նախարարի, պատմական փաստաթուղթ է:
«Նորագույն պատմության մեջ շատ քիչ են դեպքերը, երբ մենք ի վիճակի ենք եղել ստեղծել համաշխարհային բնույթի փաստաթուղթ՝ համազգային իղձերի, նպատակների եւ պահանջատիրության մասին: Երեւի թե միայն զուգահեռներ կարող ենք անցկացնել միայն անկախության հռչակագրի հետ, որը, սակայն, համահայկական չէ»,-ասաց նախարարը:
Արմեն Աշոտյանը նշեց, որ հռչակագիրը կիրառական նշանակություն ունի եւ արդեն իսկ օգտագործվել է որպես իրավական եւ քաղաքական հիմք Ցեղասպանության մասին բանաձեւեր, հռչակագրեր ընդունելու համար:
Նախարարը իր ելույթից հետո նաեւ պատասխանեց դպրոցի բարձր դասարանցիների հարցերին, որոնք վերաբերում էին ցեղասպանությանը: