Հայաստանը խոշոր ցատկերով գնում է դեպի ամբողջատիրություն։ Այս մասին այսօր՝ ապրիլի 17-ին, Ազատության հրապարակում «Հիմնադիր խորհրդարանի» հինգ կալանավորված անդամների աջակցության հանարահավաքին ասաց ազգագրագետ Հրանուշ Խառատյանը՝ նշելով, որ դրա վկայությունն այն է, որ իշխանություններն իրենց բոլոր քայլերի համար պահանջում են հասարակության հավանությունը։
«Դպրոցները, համալսարանները, ուսուցիչները խմբով հավանություն են տալիս իշխանությունների գործողություններին, եւ դրանով հասարակությունը դառնում է ամբողջատիրության մաս»,- ասաց Հրանուշ Խառատյանը։
Նա իր դժգոհությունը արտահայտեց այն առնչությամբ, որ ապրիլի 24-ին քաղաքացիների երթը դեպի Ծիծեռնակաբերդ թույլատրվելու է միայն կեսօրից՝ օտարերկյա պաշտոնական պատվիրակություների այցից հետո՝ նշելով, որ դրանով հասարակությունը բաժանվել է բարձր եւ ցածր դասակարգերի։
Նշենք, որ հանրահավաքին հաջորդելու է նաեւ երթ։ Ավելի վաղ NEWS.am-ը հայտնել էր, որ «100-ամյակն առաց ռեժիմի» շարժումն ապրիլի 7-ին հայտարարել է, որ առավոտյան ժամը 06:35-ի սահմաններում «Հիմնադիր խորհրդարանի» շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն իրականացրել: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը: Ավելի ուշ Ժիրայր Սեֆիլյանը, Վարուժան Ավետիսյանը, Գեւորգ Սաֆարյանը, Պավել Մանուկյանը եւ Գարեգին Չուգասզյանը ձերբակալվել են, ապա կալանավորվել: Նրանց նկատմամբ մեղադրանք է առաջադրվել Քրեական օրենսգրքի 225 հոդվածի 1-ին մասի հատկանիշով՝ զանգվածային անկարգություններ նախապատրաստելու հատկանիշով։ Իր հերթին հաղորդագրություն է տարածել ՀՀ Քննչական կոմիտեն, որում ասվում է, որ ՀՀ ազգային անվտանգության ծառայության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը:
