«168 ժամ» թերթը գրում է. «Ցեղասպանություն» բառի օգտագործումն Օբամայի կողմից լիովին բացառել չի կարելի: Ի վերջո, նախագահի կողմից այդ բառի գործածումը որեւէ իրավական հետեւանքներ չի առաջացնում եւ ընդամենը բառի գործածում է նշանակում: Ժամանակին իր հայ սփիչրայթերի հորդորով եւ հեղինակությամբ Ռեյգանն է այդ բառն օգտագործել: Եվ հետո՞: Հետո` ոչինչ էլ չի եղել: Նախագահ Օբաման իր վերջին նախագահական շրջանում է գտնվում եւ չի բացառվում, որ օգտագործի, թեեւ դա քիչ հավանական է: Բայց դարձյալ. ենթադրենք օգտագործեց «Ցեղասպանություն» բառը: Նախագահական խոսքերն այս երկրում օրենսդրական ուժ չունեն»,- «168.am ժամ»-ի թղթակցի հետ զրույցում ասել է քաղաքագիտության դոկտոր (Նյու Յորք) Հայկ Ա. Մարտիրոսյանն` անդրադառնալով թուրք-ամերիկյան հարաբերություններում առկա խնդիրների պայմաններում Հայոց ցեղասպանության հարցում ամերիկյան դիրքորոշման փոփոխության հնարավորությանը:

Նրա համոզմամբ՝ թուրք-ամերիկյան հարաբերությունները շատ նման են իսրայելա-թուրքական հարաբերություններին, որոնք իրենց հերթին նման են երկու ամուսինների ճակատամարտերի, որոնք ընթանում են խոհանոցում` ափսեների աղմկոտ կոտրման պայմաններում եւ ավարտվում են ճաշի սեղանի մոտ, իսկ հետո` միեւնույն անկողնում: «ԱՄՆ-ում թուրքական լոբբին չափազանց հզոր է հիմա, իսկ հանրապետականները, որոնք այսօր վերահսկում են ողջ Կոնգրեսը` Թուրքիայի մոլի սիրահարներ են: Ամեն դեպքում այսօր Թուրքիան ահռելի կարեւորություն ունի ԱՄՆ-ի համար»,- ասել է Հայկ Ա. Մարտիրոսյանը»:

Առավել մանրամասն՝ թերթի այսօրվա համարում