ԱՄՆ-ն ողջունում է ղարաբաղյան հակամարտության ժամանակ անհետ կորածների վերաբերյալ Կարմիր Խաչի հովանու ներքո տեղեկություններ փոխանակելու հարցում Հայաստանի եւ Ադրբեջանի նախագահների՝ Փարիզի գագաթնաժողովում հայտնած պատրաստակամությունը։ Այս մասին հայտարարել է ԵԱՀԿ-ում ԱՄՆ դեսպան Դանիել Բերը Վիեննայում կայացած Մշտական խորհրդի նիստում։
«Կողմերին կոչ ենք անում կոնկրետ միջոցներ ձեռնարկել այդ փոխանակման իրականացման եւ Մինսկի խմբի այլ առաջարկները կյանքի կոչելու համար, որոնք նպատակ ունեն վստահության մթնոլորտ ստեղծել կողմերի միջեւ։
Մենք նաեւ հույս ենք հայտնում, որ նախագահները այս տարի կկատարեն երկխոսությունը շարունակելու հարցում իրենց ստանձնած պարտավորությունները եւ կընդգծեն բանակցային պաշտոնական գործընթացի մեկնարկի կարեւորությունը, որը կարող է հանգեցնել համապարփակ խաղաղ համաձայնության։
Բանակցային գործընթացի արդյունքում ձեռք բերած խաղաղ լուծումն այլընտրանք չունի։
ԱՄՆ-ն՝ որպես ԵԱՀԿ ՄԽ համանախագահ, առաջվա պես աջակցում է Լեռնային Ղարաբաղում հակամարտության խաղաղ եւ կայուն կարգավորման լուծումների որոնման գործում կողմերի միջեւ համագործակցության հաստատմանը»,- հայտարարել է ԱՄՆ դեսպանը։