Hitachi ընկերության նախկին տնօրեն, ՏՏ ոլորտում Հայաստանի նախագահի մրցանակի դափնեկիր Ցուգիո Մակիմոտոն Հայաստանի մասին ճապոներեն գիրք է պատրաստում։ Այս մասին ապրիլի 18-ին լրագրողներին հայտարարել է մրցանակի հանձնման կազմակերպչական հանձնաժողովի անդամ, Synopsys Armenia ընկերության գլխավոր տնօրեն Հովիկ Մուսայելյանը։
«Մոտ ժամանակներս գիրքը լույս կտեսնի, իսկ հետո ամեն բան մեզնից է կախված՝ Հայաստանում կազմակերպել նրա շնորհանդեսը, թարգմանել այն հայերեն եւ անգլերեն։
Հիմա հանձնաժողովը ընտրում է հաջորդ մրցանակակրին։ Իհարկե, հասկանալի պատճառներով թեկնածուների անունները դեռ չի նշում։ Բանն այն է, որ հնարավոր մրցանակակիրները ՏՏ ոլորտի համաշխարհային մասշտաբի դեմքեր են եւ իրենց այցերը 2-3 տարի առաջ են պլանավորում։ Իսկ մենք մրցանակակիրներին խնդրում ենք անպայման գալ Հայաստան»,- պարզաբանեց Synopsys Armenia-ի տնօրենը։
Հիշեցնենք, որ Ցուգիո Մակիմոտոն այս մրցանակին էր արժանացել 2013թ.։ Նա ժամանել էր Հայաստան եւ նրա խոսքով՝ իր հետ տարել էր հիանալի հիշողություններ։
Այս պահին 76-ամյա Մակիմոտոն ճապոնական Taiyo Nippon Sanso ընկերության ավագ խորհրդատուն է։