ֆրանսիական Կոլին դը Սիոն սրբավայրում օրերս ՀՀ Սփյուռքի նախարարության աջակցությամբ Նանսիի հայ համայնքի ղեկավար Արթուր Ավետյանի նախաձեռնությամբ եւ Էջմիածնի քաղաքապետարանի մասնակցությամբ տեղադրվեց «Եղիցի լույս» խաչքարը:
Բացման արարողությանը մասնակցեցին Փարիզի ՀՅԴ ներկայացուցիչները եւ բազմաթիվ հայեր ոչ միայն Նանսի քաղաքից, այլեւ Փարիզից, Բեզանսոնից, Էպինալից եւ Լոնգվիից:
Խաչքարը օծեց Տեր Դիրայր Քելեջյանը:
Խաչքարի տեղադրման գործում մեծ ներդրում ունեն ֆրանսիացի հոգեւորականներ Ժան Փոլ Կլանը, հոգեւոր հայրեր Ալեքսանդրը եւ Փանոն:
Բացման հանդիսավոր արարողությանը ընթերցվեց ՀՀ Սփյուռքի նախարար Հրանուշ Հակոբյանի ողջույնի խոսքը, որտեղ մասնավորապես նշված էր. «Հատկանշական է, որ խաչքարը նվիրված է ոչ միայն Հայոց Ցեղասանության 100-րդ տարելիցին, այլեւ Հայոց գրերի գյուտին՝ խորհրդանշելով մեր ազգին բնութագրող կարեւոր երկու խորհուրդներ՝ ունենալ պատմական անկորնչելի հիշողություն եւ ամենուր ծավալել նպատակամետ գործունեություն»:
Ողջույնի խոսքով հանդես եկավ Արթուր Ավետյանը՝ նշելով. «Ես կցանկանայի, որ այս խաչքարը՝ առաջին քրիստոնյա պետության` Հայաստանի, ինչպես նաեւ Ցեղասպանության զոհերի հիշատակի հավերժացման խորհրդանիշը դառնա, միեւնույն ժամանակ դառնա միավորող վայր ու գաղափար տեղի հայության համար»:
Իր հղած ողջույնի խոսքում Էջմիածնի քաղաքապետ Կարեն Գրիգորյանը նշել էր. «Մի քանի օրից լրանում է Հայոց ցեղասպանության 100-րդ տարելիցը, եւ այս խորապատկերի վրա առավել կարեւոր է Ձեր հայրենասիրական ձեռնարկի նշանակությունը: Դա Հայրենիք-Սփյուռք կապի հավերժության հերթական ու փառավոր վկայություններից մեկն է, որը, վստահ ենք, շարւնակություն է ունենալու»:
Արարողությանը ներկա ՀՅԴ ներկայացուցիչ Ժիրայր Կարապետյանը եւս ողջունեց Նանսիի հայ համայնքի նախաձեռնությունն ու նկատեց. «Մեր պարտքն էր, որ մինչեւ այստեղ հասնեինք, որ մասնակցեինք այս նորաստեղծ համայնքի ողջունելի նախաձեռնությանը»:
Նշենք, որ Նանսիում հայկական կազմակերպված համայնք ձեւավորվեց 2011 թվականին՝ Արթուր Ավետյանի ջանքերով: Թեեւ Նանսիում չկա Հայ Առաքելական եկեղեցու շենք, այնուամենայնիվ Կաթոլիկական եկեղեցու շենքում մշտապես կազմակերպվում է պատարագ եւ անցկացվում են եկեղեցական այլ ծեսեր:
Ստեղծվեց ու մինչ օրս գործում է Մշակույթի տունը, որը զբաղվում է համայնքի կրթական ու մշակութային կյանքի կազակերպչական հարցերով: Կենտրոնի կիրակնօրյա հայկական դպրոցն ունի 60 սան:
2012 թվականին Ա.Ավետյանի ջանքերով հիմնվեց նաեւ Համազգային վարչությունն՝ իր կրթօջախով, որն իր մեծությամբ եւ պայմաններով գրեթե չի զիջում Մարսելի, Փարիզի, Լիոնի ու Վալանսի կրթօջախներին:
2013-ին Նանսիի ռադիոկայաններից մեկում՝ «Ռադիո Ֆաժեթ»-ում հեռարձակվում է նաեւ ռադիոհաղորդում՝ «Հայասա.ֆմ» կիրակնօրյա երկլեզու (հայերեն եւ ֆրանսերեն) ծրագիրը, որը պատրաստում եւ վարում են Մերինե Թադեւոսյանն ու Լուսինե Տերտերյանը: