Ապրիլի 24-ին Բելգիայի մայրաքաղաք Բրյուսելում 1915թ. հայերի եւ այլ ազգերի ցեղասպանությունների 100-ամյակի կապակցությամբ երթ կընթանա։ Միջոցառման կարգախոսն է «ժխտման 100 տարի. բավակա՛ն է։ Դատապարտենք ցեղասպանություն կատարած թուրքական պետությունը»։
Միջոցառման կազմակերպիչ հանձնաժողովում են մի շարք կազմակերպություններ, այդ թվում՝ Բելգիայում Հայոց ցեղասպանության 100-ամյակը համակարգող խորհուրդը, ինչպես նաեւ ասորիական, եզդիական, ալավիական եւ թուրքական կազմակերպություններ։ «Մենք պահանջում ենք ԵՄ կառույցների եւ անդամ պետությունների կողմից ճանաչել ցեղասպանությունը»,- նշել են նրանք։
Երթի կոչում մասնավորապես ասված է . «100 տարի առաջ Եվրոպայի հարավ-արեւելքում մեծ քաղաքակրթությունների երկիրը պղծվեց ժամանակակից պատմության առաջին ցեղասպանությամբ։ 1915թ. ապրիլի 24-ին օսմանյան կառավարությունը Ստամբուլում սկսեց հայ մտավորականների եւ քաղաքական գործիչների ձերբակալությունը, ինչը դարձավ հայերի, ասորիների, արամեացիների, խալդերի, հրեաների, Պոնտոսի հույների եւ եզդիների պարբերական ջարդերի սկիզբը, որի նպատակն էր ամբողջովին բնաջնջել ոչ իսլամական տարրը Անատոլիայում»։