Ոստիկանության քրեական հետախուզության գլխավոր վարչությունից ստացված օպերատիվ տեղեկություններն իրացնելիս՝ Շիրակի մարզային վարչության, Արթիկի եւ Մուշի բաժինների ծառայողները ապրիլի 16-ին, ժամը 23.30-ին, Փոքր Մանթաշ գյուղից, «ՎԱԶ-21099» մակնիշի ավտոմեքենայով, բերման էին ենթարկել 1987 թ. ծնված Արա Գ.-ին, 1986 թ. ծնված Գոռ Բ.-ին եւ 1983 թ. ծնված Էդգար Գ.-ին:

Զննությամբ ավտոմեքենայի սրահից հայտնաբերվել եւ առգրավվել էր «K 6.92» տիպի ինքնաձիգ` լիցքավորված 9 մմ տրամաչափի 8 փամփուշտով:

Ապրիլի 17-ին, ժամը 01.00-ին, Էդգար Գ.-ն հաղորդում է տվել, որ ապրիլի 16-ին, ժամը 19.00-ի սահմաններում, Սպիտակ քաղաքի Ս. Ավետիսյան փողոցում գտնվող եկեղեցու դիմացից իր ծանոթներ ոմն Հովոն, Ուդին եւ Գոռ Բ.-ն առեւանգել են իրեն, ծեծի ենթարկել եւ դեմքի մասում պատճառել վնասվածքներ:

Ձեռնարկված միջոցառումների շնորհիվ պարզվել է, որ Հովոն 1975 թ. ծնված Հովհաննես Թ.-ն է, իսկ Ուդին` 1974 թ. ծնված Ռուբեն Ս.-ն:

Նշանակվել են դատաձգաբանական եւ դատաբժշկական փորձաքննություններ:

Ձեռնարկվում են միջոցառումներ Հովհաննես Թ.-ին հայտնաբերելու ուղղությամբ:

Ռուբեն Ս.-ն, Գոռ Բ.-ն եւ Արա Գ.-ն ձերբակալված են:

Կատարվում է քննություն: