Գյումրու «Մոր եւ մանկան»հիվանդանոցում ապրիլի 14-ին մահացած 6 ամսական Նարե Դավթյանի փաստի առթիվ նյութեր են նախապատրաստվում: Այս մասին NEWS.am-ին հայտնեցին ՀՀ Քննչական կոմիտեի մամուլի ծառայությունից:
Նրանց փոխանցմամբ՝ նյութեր են նախապատրաստվում մամուլի հրապարակումների հիման վրա:
Նշենք, որ մահացած փոքրիկի հարազատները հիվանդանոցի բժիշկներին են մեղադրում կատարվածի մեջ: Երեխայի հայրը՝ Արմեն Դավթյանը NEWS.am-ին պատմել էր, որ երեխան վատացել է ապրիլի 14-ի առավոտյան:
«Առավոտյան երեխան հազացել է, ինչ որ հազալուց բերանից փրփուր է եկել, ինձի ձեն տվավ կինս, ելանք, բերանը սրբեցինք ու բերեցինք հիվանդանոց, մայրն էլ հիվանդանոցում էդպես ներկայացրել է, բժիշկները երեւի մտածել են երեխայի մոտ էպիլեպսիա է ու էպիլեպսիայի դեմ են բուժել, բայց մենք ասեցինք, որ երեխայի մոտ էդ հիվանդությունը չկա, իրանք սխալ բուժում են նշանակել, դրա համար երեխան չի դիմացել ու սիրտը կանգնել է»,- ասել էր երեխայի հայրը:
Ըստ բժիշկների՝ փոքրիկը բնածին հիվանդություն է ունեցել՝ հիդրոցեֆալիա, ինչի հետեւանքով մահացել է երեխան։
