Թուրքական «Բիլքենթ» համալսարանի դասախոսներից, դոկտոր Էսրա Չուհուդարը հայտարարել է, թե շատ մեծ սխալ է Գալիպոլիի 100-ամյակը նշել ապրիլի 24-ին։
Թուրքական Arca գործակալության փոխանցմամբ՝ թուրք դոկտոր Էսրա Չուհուդարը հայտարարել է, թե Անկարան ռազմավարական սխալների մեջ է գտնվում։ «Թուրքական պատվիրակությունը Հայաստանի հետ հարաբերությունների կարգավորման գործընթացքում օրակարգ է բերել Ղարաբաղի հարցը, ինչը հայ-թուրքական հարաբերությունների կարգավորումը բարդացրել է 5 անգամ»-ասել է թուրք դասախոսը։
Անդրադառնալով Գալիպոլիի միջոցառումներին, Էսրա Չուհուդարը շեշտել է, որ շատ մեծ սխալ է այն մարտի 18-ի փոխարեն նշել ապրիլի 24-ին։ Ըստ գիտնականի՝ տպավորություն է, որ ողբերգությունների մրցույթ է, ինչն ավելի է սրում Հայաստանի հետ առկա լարվածությունը։
«Տեղի ունեցած պատմական ողբերգության հետ Թուրքիան չի կարողացել առերեսվել, բայց հուսով եմ, որ կսկսենք, ստիպված կլինենք սկսել։ Թուրքիան պետք է անցնի առերեսման միջով»,-ասել է Էսրա Չուհուդարը։