Հայոց ցեղասպանության վերաբերյալ Հռոմի Պապի հայտարարությունից հետո Թուրքիայում ապրող հայերի վրա ճնշումներն ավելացել են։
Ինչպես տեղեկացնում է թուրքական T24.com կայքը, Հռոմի Պապի հայտարարությունից հետո Ադանա նահանգի (Կիլիկիա-խմբ) Ջեյհանի շրջանի Դումլույան գյուղում ապրող հայ ընտանիքը կանգնել է հացի խնդրի առաջ։
Հռոմի Պապի ելույթից հետո Ջեյհանի քայմաքամը կտրել է հայ ընտանիքի սոցիալական նպաստը՝ ասելով, թե գնացեք Հայկական սփյուռքից օգնություն ստացեք։ Իսկ գյուղացիներն էլ իրենց հերթին հրաժարվում են վարձակալել հայ ընտանիքին պատկանող գյուղատնտեսական նշանակության մեքենան։
Սակայն այս ամենը չի վախեցրել Վաննիս Չեթինյանին, ով պնդում է, թե մինչ Թուրքիան չընդունի ցեղասպանությունը, խաղաղություն չի լինի։
Կնոջ՝ Հայաթ Չեթինյանի եւ երկու երեխաներ Պիեռ եւ Փաուլ Չեթինյաների հետ միասին ապրող Վաննիս Չեթինյանը նշել է, որ ենթարկվում են գյուղացիների ճնշմանը, իսկ դպրոցում երեխաներին ասում «գյավուր» եւ «դուշման»։
Վաննիսը պատմել է, որ ծնվել է այդ գյուղում եւ երբ իր 12 տարին լրացել է, պապն իրեն պատմել է տեղի ունեցած ցեղասպանության մասին, որ թուրքերը 1,5 մլն հայ են սպանել։ «Ոչ-ոք չի կարող ժխտել ցեղասպանությունը։ Ցեղասպանություն է եղել, որի ժամանակ բռնաբարել երեխա աղջիկներին, կանանց, կոտորել տղամարդկանց։ 1915-ից մինչեւ հիմա ոչինչ չի փոխվել»,-նշել է Վաննիսը՝ շեշտելով, որ իր ցանկությունն է, որ երեխաները մեծանան՝ յուրացնելով հայկական մշակույթը։
