Կնոջը՝ Դիանա Նահապետյանին, դանակի 21 հարվածով սպանելու մեջ մեղադրվող Վոլոդյա Մուրադյանը 3-րդ անգամ կենթարկվի դատահոգեբանական, դատահոգեբուժական համալիր հանձնաժողովային փորձաքնության։ Այսօր՝ ապրիլի 18-ին, նման որոշում կայացրեց Արտաշատ քաղաքի Արարատի եւ Վայոց Ձորի մարզերի ընդհանուր իրավասության դատարանը՝ բավարարելով մեղադրող Հայկազ Նիկողոսյանի միջնորդությունը։
Մեղադրողը միջնորդել էր, սակայն, անցկացնել միայն դատահոգեբանական կրկնակի հանձնաժողովային փորձաքննություն, քանի որ դատահոգեբուժական փորձաքննության եզրակացությունը, ըստ նրա, վիճահարույց չէ։
Մեղադրողը միջնորդեց դատահոգեբանական հանձնաժողովային կրկնակի փորձաքննության կատարումը հանձնել ՀՀ առողջապահության նախարարի կողմից ստեղծված հանձնաժողովին, որը պետք է պարզաբանի, թե ամբաստանյալի մոտ հնարավոր ֆիզիոլոգիական աֆեկտի երրորդ փուլը որքան է տեւել եւ արդյոք աֆեկտային երրորդ փուլում գտնվելիս նա կարող էր որոշակի նպատակաուղղված գործողություններ կատարել. հեռախոսազանգեր կատարել, տնից դուրս գալ, դուռը փակել, գիտակցել Երեւանի եւ Արարատի ոստիկանական բաժիններ հանձնվելու տարբերությունը: Փորձաքննությունը պետք է պարզի նաեւ՝ արդյոք Վոլոդյա Մուրադյանը սպանությունը կատարելու պահին գտնվել է հոգեկան աֆեկտի վիճակում։
Տուժողի իրավահաջորդի ներկայացուցիչ Նարինե Մկրտչյանը կողմ արտահայտվեց նման փորձաքննություն անցկացնելուն, նրա խոսքով՝ նախորդ դատական նիստին հարցաքննված հոգեբան-փորձագետ Էլդա Գրինի եզրակացությունը խիստ սուբյեկտիվ էր:
Հիշեցնենք, որ, ըստ մեղադրական եզրակացության, Դիանայի ամուսինը՝ 51-ամյա Վոլոդյա Մուրադյանը, 2012թ. դեկտեմբերին առանձնակի դաժանությամբ սպանել էր իր կնոջը: Սկզբում ծաղկամանով հարված էր հասցրել վերջինիս գլխին, այնուհետեւ ոտքով հարվածել ծնոտին եւ մարմնի այլ մասերին, իսկ վերջում քարշ էր տվել խոհանոց եւ 21 դանակի հարված հասցրել: Վերոնշյալ տեսարանին ականատես էին եղել Դիանայի 14-ամյա եւ 17-ամյա դուստրերը, ովքեր դուրս էին վազել բնակարանից եւ հարեւաններից օգնություն խնդրել։
