Գյումրիում ապրիլի 18-ին տեղի ունեցած սպանության առնչության Մհեր Մկրտչյան 34Ա շենքի ներսում եւ դրսում շարունակվում են քննչական գործողությունները:
Գյումրիում NEWS.am-ի թղթակիցը հաղորդում է, որ շենքի բակում կայանված է անհայտ անձի պատկանող «Մերսեդես» մակնիշի 34FM965 պետհամարանիշով մեքենա, որը ոստիկանների հսկողության տակ է: Քննիչները դեպքի վայրում հավաքվածներին նախազգուշացնում են, որ մեքենան առնչություն ունի դեպքի հետ եւ թույլ չեն տալիս մոտենալ կամ դիպչել դրան:
Նշենք, որ դեպքի վայրում աշխատող քննիչները փակել են շենի մուտքը, եւ հերթով հարցաքննում են հարեւաններին: Դեպի վայրում է նաեւ Շիրակի մարզի նորանշանակ ոստիկանապետ Գրիգոր Ամիրխանյանը:
Ավելի վաղ NEWS.am-ը հայտնել էր, որ ապրիլի 18-ին Գյումրիում սպանություն է տեղի ունեցել. Մհեր Մկրտչյան 34Ա շենքի բնակարաններից մեկում հայտնաբերել են մայր ու աղջկա՝ դանակահարված վիճակում: Թաղամասում տարածված տեղեկությունների համաձայն` տունը տակն ու վրա արված է եղել, ենթադրվում է, որ ավազակային հարձակում է եղել: Շիրակի մարզի դատախազ Րաֆֆի Ասլանյանը մեզ հետ զրույցում ասել էր, որ սպանված հայտնաբերված մոր եւ դստեր վրա դանակի բազմաթիվ հարվածների հետքեր կան: Մեր տեղեկություններով՝ մայրն ու դուստրը՝ 71-ամյա Քնարիկ Շահումյանը եւ 50-ամյա Ալվարդ Շահումյանը, Գյումրիում հայտնի էին որպես «տոկոսով» գումար տվողներ: