Արդեն եղել է այն ցունամին, որից Թուրքիան վախենում էր։ Այս մասին այսօր՝ ապրիլի 20-ին, լրագրողներին ասաց ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը՝ անդրադառնալով Հայոց ցեղասպանության 100-ամյակին։
Կիրո Մանոյանի գնահատականով՝ հատկապես Հռոմի պապի մատուցած սուրբ պատարագը ստեղծեց այդ ցունամին։
«Այս ցունամին շարունակվելու է նաեւ առաջիկա օրերին Երեւանում կայանալիք միջոցառումների ժամանակ։ Պետք է շեշտել նաեւ, որ Թուրքիան տապալեց նաեւ ինքն իր նախաձեռնությունը, որ Գալիպոլիի 100-ամյակը նշելը պետք է ստվեր գցեր Հայոց ցեղասպանության 100-րդ տարելիցին նվիրված միջոցառումների վրա։ Սակայն այդպես չեղավ։ Հակառակը Թուրքիայի միջոցառումն ավելի մեծացրեց միջազգային հանրության ուշադրությունը Հայոց ցեղասպանության վրա»,- ասաց Կիրո Մանոյանը։
Նրա խոսքով՝ ապրիլի 22-24-ը Հայաստանում են ժամանելու մեծ թվով գիտնականներ, պատմաբաններ, քաղաքական գործիչներ, պետությունների ղեկավարներ։ Այս փաստը, ըստ Մանոյանի, ավելի կմեծացնի ստեղծված ցունամին։
Նշենք, որ ապրիլի 22-24-ը Հայաստանում եւ ամբողջ աշխարհում սպասվում են մի շարք միջոցառումներ՝ նվիրված Հայոց ցեղասպանության 100-րդ տարելիցին։