Քուվեյթահայ գրող, հրապարակախոս Կիրակոս Գույումջյանը Հայոց ցեղասպանության տարելիցին ընդառաջ «Ինքնիշխանության բնաջնջումից 100 տարի անց» վերնագրով նոր գիրք է հրապարակել։ «Ալ Ջարիդա» արաբալեզու պարբերականը ապրիլի 19-ին հրապարակած հոդվածում անդրադարձել է Գույումջյանի աշխատությանը։ Թերթը մասնավորապես գրում է.
«Կարո (Կարապետ) Գույումջյանը 2015թ. Քուվեյթում հրատարակած աշխատության միջոցով անդրադառնում է Առաջին համաշխարհային պատերազմի տարիներին Օսմայան Թուրքիայում իրականացված հայոց ցեղասպանությանը։ Գույումջյանը իր գրքում է, որ Թուրքիային չի հաջողվի աղավաղել պատմությունը՝ չնայած նախագահ Ռեջեփ Թայիփ Էրդողանի ջանքերին, որը դիվանագիտական, քաղաքական ամենատարբեր միջոցներով փորձում է աշխարհի ուշադրությունը շեղել Հայոց ցեղասպանությունից եւ դրան զոհ գնացած 1.5 մլն հայերի հիշատակման արարողություններին։ Հենց այդ նպատակով նա որոշել է Չանաքքալեի ճակատամարտի 100-ամյակի միջոցառումներն անցկացնել նույն օրը՝ ապրիլի 24-ին, երբ ողջ աշխարհի հայերը հարգանքի տուրք են մատուցում զոհերի հիշատակին։ Հենց այդ նպատակով է նա Թուրքիայի հրավիերլօ համաշխարհային առաջնորդներին»։
Պարբերականը հատվածներ է մեջբերում Գույումջյանի գրքից, որտեղ հեղինակը նշում է, որ մարդկության դեմ գործած այդ չարիքի պատասխանատվությունը դեռ մնում է միջազգային հանրության խղճի վրա։
«Շատ կարեւոր է, որպեսզի ապագայում այս չարիքը այլեւս չկրկնվի։ Դրա համար միջազգային հանրությունը արդարությունը վերականգնելու պահանջով պետք է ստիպի թուրքական ռեժիմին պատասխան տալ իր արարքների համար։ Հայ ժողովուրդը երբեք չի հրաժարվի իր պատմական իրավունքներից։ Այսօր մենք ցանկանում ենք, որ 20-րդ դարի սկզբին Օսմանյան Թուրքիայում զոհված 1.5 մլն հայերի հոգիները հանգչեն խաղաղությամբ, եւ քանի դեռ Թուրքիան ժխտում է կատարվածը, մենք պետք է շարունակենք ներկայացնել նրանց պահանջները»,- մեջբերում է հեղինակին «Ալ Ջարիդան»։
