Վրաստանում ՀՀ քաղաքացիների ժամանակավոր կացության խնդիրը լուծված է: Այս մասին, այսօր՝ ապրիլի 20-ին, Երեւան-Թբիլիսի տեսակամուրջի ժամանակ հայտարարել է Վրաստանի արդարադատության նախարարության Հասարակական ծառայությունների զարգացման գործակալության Ախալքալաքի մաժնի ղեկավար Ռուբեն Պալյանը:
Նա հիշեցրել է, որ 2014-ի սեպտեմբերի 1-ից Վրաստանում ուժի մեջ է մտել օրենք, որն արգելում է Վրաստանի եւ այլ երկրի անձնագրերի միաժամանակյա շրջանառությունը: «Այդ ամենը ժամանակին մարդկանց բացատրել են, նախազգուշացրել են հնարավոր խնդիրների մասին: Արդարադատության նախարարությունը տեղում կարողացել է լուծել անհրաժեշտ խնդիրները, եւ ՀՀ քաղաքացիների համար ժամանակավոր կացության դիմումների տրամադրման գործընթացը հետաձգվել է»,-ասել է Պալյանը:
Նշենք, որ 2014-ի սեպտեմբերից մինչ օրս Ջավախքի հայության կողմից ժամանակավոր կացության 3 149 դիմում է եղել, որոնցից մերժվել է 23-ը, հիմնականում փաստաթղթերի ու օրենքի չիմացության խնդիրների պատճառով: Պալյանը նաեւ հիշեցրել է, որ Ախալքալաքում նախատեսվում է նոր Արդարադատության տուն կառուցել, որը կազատի տարածաշրջանի բնակիչներին փաստաթղթեր ներկայացնելու համար Թբիլիսի մեկնելու անհրաժեշտությունից:
