Վրաստանը չքաղաքականացրեց Ջավախքի հայերի քաղաքացիության հարցը։ Այս մասին ապրիլի 20-ին հայտարարել է Կովկասի ինստիտուտի փոխտնօրեն Սերգեյ Մինասյանը։
Խնդիրը վերաբերում էր Սամցխե Ջավախեթիում ապրող հազար բնակիչների, որոնք հայկական անձնագրերով մեկնել էին Ռուսաստան արտագնա աշխատանքի։ Քաղաքագետը նշեց, որ բազմաթիվ տեխնիկական հարցեր դեռ համաձայնեցված չեն, սակայն պետական մակարդակով հարցը չի քաղաքականացվել եւ վրացական կողմը ըմբռնումով է մոտեցել հայերի համար հարցի կարեւորությանը։ Նրա խոսքով՝ խնդիրը վերաբերում է ոչ միայն Ջավախքի հայերին, այլ նաեւ Ռուսաստան արտագնա աշխատանքի մեկնող Վրաստանի մյուս ազգային փոքրամասնությունների ներկայացուցիչներին։ Նման խնդիր առաջացել էր Քվեմո-Քարթլիի ադրբեջանցիների հետ։ «Չպետք է մոռանանք, որ Վրաստանում երկքաղաքացիության թեման շատ նուրբ հարց է, եթե հատկապես 2-րդ քաղաքացիությունը Ռուսաստանինն է։ Սակայն կոնկրետ ջավախահայության խնդիրը Վրաստանի քաղաքական վերնախավը չի քաղաքականացրել»,- ասաց Մինասյանը։
Հիշեցնենք, որ 2014թ. սեպտեմբերի 1-ից Վրաստանը կրճատել է իր պետության տարածքում առանց գրանցման բնակվելու իրավունքը օտարերկրյա քաղաքացիների համար՝ 180 օրվանից հասցնելով 90 –ի։ Դե ֆակտո երկքաղաքացիություն ունեցող անձանց սկսեցին զրկել Վրաստանի քաղաքացիությունից։