Գերմանիայի իշխող կուսակցությունները կողմ են, որ Օսմանյան կայսրության տարածքում 1915թ. իրականացված հայոց ջարդերը որակվեն ցեղասպանություն եզրով։ Առաջիկա օրերին այս հարցը կքննարկվի Բունդեսթագում։
Գերմանիայի արտգործնախարար Ֆրանկ Վալտեր Շթայմայերը անցել է այն գործիչների կողմը, որոնք Օսմանյան կայսրության տարածքում ջարդերը ցեղասպանություն բառով են նկարագրում։ «1915թ. տեղի ունեցածը կարելի է միավորել ցեղասպանություն հասկացության տակ»,- հայտարարել է նա Süddeutsche Zeitung-ին տված հարցազրույցի ժամանակ, փոխանցում է DW-ն։
Սոցիալ-դեմոկրատական կուսակցության առաջնորդներից մեկի խոսքով՝ նա կարող է լավ հասկանալ այն մարդկանց զգացմունքները, որոնք պահանջում են Օսմանյան կայսրությունում հայերի դեմ իրականացված ջարդերի համար սահմանել ցեղասպանություն հասկացությունը։ Միաժամանակ Շթայնմայերը նշել է, որ այդ հարցի շուրջ քաղաքական սուր քննարկումները կարող են բարդացնել կամ անհնար դարձնել Թուրքիայի եւ Հայաստանի միջեւ սկսված լուրջ եւ ուղիղ երկխոսության սկիզբը։
Իր հերթին Բունդեսթագում ՔԴՄ/ՔՍՄ դաշինքի փոխնախագահ Ֆրանց Յոզեֆ Յունգը հայտարարել է, որ իր կուսակցությունը մտադիր է հայերի ջարդերը ցեղասպանություն որակել՝ չնայած Անկարայի բողոքին։ «Մենք կգտնենք այն ձեւակերպումը, որը համապատասխան կերպով կսահմանի 100 տարի առաջ Օսմանյան Թուրքիայում տեղի ունեցած ցեղասպանության փաստը»,- հայտարարել է նա Saarbrücker Zeitung պարբերականին։
Ցեղասպանություն եզրը պետք է առկա լինի բանաձեւի տեքստում, որը մոտ օրերս կընդունի Բունդեսթագը, նշել է Յունգը եւ վստահություն հայտնել, որ Գերմանիայի նախագահ Յոահիմ Գաուկը կարտասանի այդ բառը։
Մինչ այս պահը Գերմանիայի կառավարությունը խուսափում էր օգտագործել ցեղասպանություն բառը, որպեսզի չբարդացնի Թուրքիայի հետ հարաբերությունները, նշում է Reuters-ը։ Ապրիլի 24-ին Բունդեսթագում քննարկման է դրվելու հայերի դեմ կատարվածը ցեղասպանություն եզրով սահմանելու բանաձեւը։
