Եգիպտոսի մայրաքաղաք Կահիրեի քրեական դատարանը ապրիլի 20-ին հաստատել է նախկին նախագահ Մուհամմեդ Մուրսիի 22 կողմնակիցների դեմ կայացրած մահվան դատավճիռը։ Այ մասին գրում է «Ալ Ահրամ» պարբերականը։
Գործող իրավական պրակտիկայի համաձայն՝ մարտի 18-ին կայացրած վճիռները ուղարկվել են երկրի գլխավոր մուֆթիի հաստատմանը։ Դրանից հետո դատարանը նորից վերադարձել էր գործի քննարկմանը՝ վերջնական վճիռ կայացնելու համար։ Մահվան դատապարտվածներից 14-ը եղել են դատարանի դահլիճում, եւս 8-ի դեմ քրեական հետախուզում է հայտարարված։ 14 մարդ էլ դատապարտվել է 14 տարվա ազատազրկման, գրում է ՏԱՍՍ-ը։
Դատարանը քննում էր գրեթե 2 տարվա վաղեմության գործը, երբ 2013թ. «Մուսուլման եղբայրների» եւ նրանց համախոհների իշխանազրկումից հետո նրանց կողմնակիցները երկրում անկարգությունների եւ բռնությունների ալիք էին բարձրացրել։