Դոնի Ռոստովում ապրիլի 10-ից մեկնարկել են Հայոց ցեղասպանության հիշատակի միջոցառումները։ Ինչպես NEWS.am-ը տեղեկանում է Դոնի Նախիջեւանի հայկական համայնքից, ապրիլի 23-ին Դոնի Ռոստովի բոլոր հայկական եկեղեցիներում կհեռարձակվի Էջմիածնում Ցեղասպանության զոհերի սրբադասման արարողությունը։
Հիմնական միջոցառումները կկայանան ապրիլի 24-ին։ Սուրբ Կարապետ եկեղեցում մատուցվող պատարագից հետո կմեկնարկի 10 000 մարդուց բաղկացած սգո երթ՝ կոչ անելով ճանաչել եւ դատապարտել Հայոց ցեղասպանությունը։ Միջոցառումների գագաթնակետը կլինի Ռուսաստանում միակ «Ո՛չ Ցեղասպանությանը» հուշարձանի բացման արարողությունը, որը հայտարարում է. «Ցեղասպանությունն ազգություն չի ճանաչում։ Ո՛չ մարդկության դեմ հանցագործություններին»։
Հուշարձանի հեղինակը հայ քանդակագործ Մկրտիչ Մազմանյանն է։