«Իսլամական պետություն» (ԻՊ) խմբավորման եւ աֆղանական «Թալիբան» շարժման զինյալները միմյանց սրբազան պատերազմ՝ ջիհադ են հայտարարել: Աֆղանական Գիլմենդ գավառի ղեկավար Նաբի Ժան Մուլլահիլը հայտարարել է, որ համապատասխան փաստաթղթերը հայտնվել են երկրի անվտանգության ուժերի տրամադրության տակ:
Պաշտոնյայի խոսքով, թալիբներին ընդդիմացող նոր խմբավորումներն Աֆղանստանում հայտնվում են «որոշակի օտարերկրյա հատուկ ծառայությունների» աջակցությամբ, որոնք փորձում են հասնել կառավարության եւ «Թալիբան»-ի ներկայացուցիչների միջեւ խաղաղ բանակցությունների խափանման:
The Oslo Times-ի փոխանցմամբ, ահաբեկչական երկու կազմակերպությունների միջեւ հակամարտությունը սկսվել է այն բանից հետո, երբ ԻՊ-ի առաջնորդ Աբու Բաքր ալ-Բաղդադին «Թալիբան»-ի հիմնադիր մոլլա Մոհամմադ Օմարին անվացել է «հիմար եւ անգրագետ հրամանատար», որը «ո՛չ հոգեւոր, ո՛չ քաղաքական վստահության» արժանի չէ:
Ի պատասխան, թալիբների առաջնորդը հայտարարել է, որ շարժման ոչ մի անդամ չի կանգնի «Իսլամական պետության» դրոշի ներքո, եւ դրանք երբեք չեն հայտնվի աֆղանական հողում:
Խմբավորումների միջեւ բախումների մասին տեղեկություններ դեռեւս չկան: