Կառավարության այս շաբաթվա նիստը կկայանա վաղը՝ ապրիլի 22-ին, քանի որ այս անգամ ավանդական հինգշաբթի օրը ոչ աշխատանքային է: NEWS.am-ը Կառավարության կայքից տեղեկացավ, որ օրակարգում ընդգրկված են մի շարք հարցեր, այդ թվում՝՝ Կոտայքի մարզի Աբովյանի քաղաքային համայնքի ղեկավարի լիազորությունները վաղաժամկետ դադարեցնելու, համայնքի ղեկավարի արտահերթ ընտրություն նշանակելու, անցկացնելու և ընտրության նախապատրաստման ու անցկացման ծախսերը ֆինանսավորելու մասին հարցը:
Կառավարության որոշումները ուժի մեջ են մտնում հրապարակվելուց հետո: Որոշումը հրապարակելուց հետո՝ 40-րդ օրվա վերջին կիրակի օրը, կկայանան ընտրությունները: Եթե որոշումը հրապարակվի հենց մյուս շաբաթ, ապա ընտրությունները կկայանան հունիսի 7-ին:
Նշենք, որ Կառավարության նիստի օրակարգում ընդգրկված են նաեւ այլ հարցեր, օրինակ՝ պետք է որոշում կայացնեն մի շարք պետական հիմնարկներին, օրինակ՝ Տավուշի մարզպետարանին, Կառավարությանը, ՏԿԱԻՆ-ին, ոստիկանությանը գումար հատկացնելու մասին, մի շարք համաձայնագրերի հավանություն կտրվի: Կարեւոր նախաձեռնություններից է նաեւ կերերի և կերային հավելումների արտադրությանը, ինչպես նաև կերերի և կերային հավելումների օգտագործմանը ներկայացվող պահանջները սահմանելը: Կառավարության նիստում որոշում կկայացվի նաեւ տարրական դասարանների աշակերտներին անվճար դասագրքերով և ուսումնական գրականությամբ ապահովում ու ավագ դպրոցների դասագրքերի հրատարակման գծով պետական բյուջեով նախատեսված հատկացումների օգտագործման ուղղությունները հաստատելու մասին: