Վերջին երկու շաբաթների ընթացքում «Գուգլ» որոնման համակարգում աճել է «Հայոց ցեղասպանություն» բառը փնտրողների քանակը։ Այս մասին այսօր՝ ապրիլի 21-ին, լրագրողներին ասաց տեղեկատվական անվտանգության փորձագետ Սամվել Մարտիրոսյանը։
Նրա խոսքով՝ աշխարհում մարդկանց հետաքրքրությունն աճել է հենց Քիմ Քարդաշյանի հայաստանյան այցից եւ Վատիկանում Հռոմի պապի հայտարարությունից եւ մատուցած պատարագից հետո։
«Պետք չէ մոռանալ նաեւ, որ Եվրախորհրդարանն ընդունել է հատուկ բանաձեւ, բրիտանական եւ ամերիկյան մամուլն են սկսել գրել Հայոց ցեղասպանության մասին, SOAD-ն է սկսել համերգային շրջագայությունը, որի թեման հենց Ցեղասպանության 100-րդ տարելիցն է։ Այս ամբողջը շատ ուժեղ ռեզոնանս է ստեղծում, բայց Քիմ Քարդաշյանն ու Հռոմի պապը պայթյունային էֆեկտ ունեցան։ Իհարկե, այսօր որոնողների թիվը նվազել է, սակայն Ցեղասպանության թեման չի փակվել»,- ասաց Սամվել Մարտիրոսյանը։
Նրա խոսքով՝ շատ կարեւոր է, որ կարողանանք միջազգային հարթակում շարունակել պահել Ցեղասպանության թեման։