Հայոց ցեղասպանության մասին Հռոմի Պապի պատմական հայտարարությունից եւ հաջորդիվ Եվրախորհրդարանի կողմից Ցեղասպանությունը դատապարտող բանաձեւից հետո ամերիկացի սենատորներ Ռոբերտ Մենենդեսը, Մարկ Քիրքը, Բարբարա Բոքսերը եւ Քորի Գարդները բանաձեւի փաթեթ են ներկայացրել, որը Թուրքիայի կողմից Հայոց ցեղասպանությունը ճանաչելու հիման վրա հայ-թուրքական ամուր հարաբերություններ հաստատելու կոչ է անում։ Այս մասին NEWS.am-ին հայտնել են Ամերիկայի հայ դատի հանձնախմբի մամուլի ծառայությունից։
Երկկուսակցական նախագիծը առաջ է քաշվել ԱՄՆ նախագահ Բարաք Օբամայի ապրիլքսանչորսյան հայտարարությունից առաջ, որը շատերը բեկումնային են համարում Հայոց ցեղասպանության հարցում ԱՄՆ քաղաքականության առումով։ Փաստաթղթի հեղինակները ողջունում են պոնտիֆիկոսի հայտարարությունը, որով նա «թուրքերի կողմից հայերի դեմ իրականացրած չարիքը կոչել է 20-րդ դարի առաջին ցեղասպանություն»։
Նախագծի համահեղինակները ընդգծել են Հայոց ցեղասպանության փաստի հաստատման հարցում ԱՄՆ քաղաքականության կարեւորությունը։ «100 տարի առաջ 1.5 մլն հայ տղամարդիկ, կանայք եւ երեխաներ Հայոց ցեղասպանության ժամանակ սպանվել են թուրք օսմանների կողմից ։ Ժամանակն է, որպեսզի այդ չարիքը կոչվի այնպես, ինչպես այն իրականում եղել է, այն է՝ հայ ժողովրդի նպատակաուղղված բնաջնջում։ Բանաձեւը պարզ ասում է, որ անհնար է ժխտել ցեղասպանության փաստն ու Հայոց ցեղասպանության պատմությունը։ Այն ժամանակ, երբ աշխարհը պատրաստվում է ապրիլի 24-ը նշել իբրեւ Հայոց ցեղասպանության օր, ԱՄՆ-ը պետք է պարտավորություն ստանձնի ճանաչել այդ ցեղասպանության ամբողջական նշանակությունը, մասշտաբներն ու պատմությունը, որպեսզի հարգի անմեղ զոհերի հիշատակն ու ապագայում կանխի նման ողբերգությունները»,- նշել է սենատոր Ռոբերտ Մենենդեսը։
«Այս տարի լրանում է Ցեղասպանության 100-ամյակը։ Ողբերգություն, որը սեւ հետք թողեց աշխարհի խղճի վրա։ Ավելի քան 20 երկրներ, ԱՄՆ 43 նահանգ եւ Հռոմի Պապը միանշանակ հաստատել են Հայոց ցեղասպանության փաստը։ Հիմա ժամանակն է, որ ԱՄՆ-ը նույնպես միանա նրանց»,- ընդգծել է Բարբարա Բոքսերը։
«Պապի կոչը բոլորի հայացքներն ուղղում է այն ընտրությանը, որի առջեւ կանգնած է նախագահ Օբաման ապրիլի 24-ից առաջ։ Այն ժամանակ, երբ աշխարհը հետեւում է 100-ամյակին, նախագահ Օբաման պետք է որոշում կայացնի։ Նա կարող է ասել ճշմարտությունը եւ հաստատել Ցեղասպանության դեմ պայքարի գործում ԱՄՆ սկզբունքային ղեկավարության ժառանգությունը կամ կարող է տեղի տալ Անկարայի սպառնալիքներին՝ թույլ տալով թուրքական կառավարությանը խստացնել բերանը փակելու քաղաքականությունը, որը նա փաթաթում է ԱՄՆ-ի կառավարությանը»,- ասել է Հայ դատի հանձնախմբի գործադիր տնօրեն Արամ Համբարյանը։
Նշենք, որ զուգահեռ փաստաթուղթը՝ Հայոց ցեղասպանության արդարության եւ ճշմարտության մասին բանաձեւի նախագիծը (H.Res.154) առաջ է քաշվել ԱՄՆ Կոնգրեսի Ներկայացուցիչների պալատում։
