Հայաստանի Ազգային ժողովն իր արտահերթ նիստում քեարկությամբ ընդունեց Հայոց ցեղասպանության մասին հայտարարությունը:
Արտահերթ նիստին ներկա էր 112 պատգամավոր:
Հայտարարությունն ընդունվեց միաձայն՝ 112 կողմ, 0 դեմ, 0 ձեռնպահ ձայներով:
Նախքան քվեարկությունը, ԱԺ նախագահ Գալուստ Սահակյանը հայտարարեց, որ անմիջապես հետո անցկացնելու են խորհրդակցություն, որի ընթացքում քննարկելու են իրենց մասնակցությունը Հայոց ցեղասպանության 100-րդ տարելիցի միջոցառումներին:
Հայտարարությունում ասվում է.
«Հայաստանի Հանրապետության Ազգային ժողովը՝
– հիմք ընդունելով ՄԱԿ-ի Գլխավոր վեհաժողովի՝ 1948 թվականի դեկտեմբերի 9-ին ընդունած «Ցեղասպանության հանցագործությունը կանխարգելելու եւ պատժելու մասին» կոնվենցիան, ՀԽՍՀ Գերագույն խորհրդի՝ 1988 թվականի նոյեմբերի 22-ին ընդունած «Օսմանյան Թուրքիայում հայերի 1915 թ. ցեղասպանության դատապարտման մասին» օրենքը,
– արժեւորելով Հայոց ցեղասպանության 100-րդ տարելիցի համահայկական հռչակագրով ամրագրված դրույթները,
– կարեւորելով միջազգային հանրության հետ համատեղ ուժերով մարդկության դեմ հանցագործությունների, ցեղասպանությունների դատապարտմանը եւ կանխարգելմանն ուղղված ջանքերում հայ ժողովրդի ներդրումը,
– երախտագիտություն հայտնելով բոլոր պետությունների խորհրդարաններին, պետական եւ տեղական կառույցներին ու միջազգային կազմակերպություններին, որոնք պաշտոնապես ճանաչել են Հայոց ցեղասպանությունը, ընդունել Հայոց ցեղասպանության ժխտումը քրեականացնող օրենքներ,
կոչ է անում բոլոր երկրների խորհրդարաններին, միջխորհրդարանական եւ միջազգային կազմակերպություններին պաշտոնապես ճանաչել եւ դատապարտել Օսմանյան կայսրության իրականացրած Հայոց ցեղասպանությունը` որպես մարդկության դեմ ուղղված ծանրագույն հանցագործություն»: