Եվրասիա միջազգային համալսարանն ապրիլի 20-ին հյուրընկալել է 1913-1916 թթ.-ին Կոստանդնուպոլսում ԱՄՆ դեսպան Հենրի Մորգենթաուի ծոռնուհուն՝ Հարվարդի համալսարանի դասախոս, հոգեբան, ազգությամբ հրեա Պամելա Շտայներին։
Հանդիպման ընթացքում ուսանողների կողմից հնչեցին հետաքրքիր հարցադրումներ, զրույցը ծավալվեց Հենրի Մորգենթաուի՝ որպես դեսպանի կատարած դերի, Հայոց ցեղասպանության ճանաչման, այդ հարցում ԱՄՆ-ի դիրքորոշման, հայ-թուրքական հարաբերությունների կարգավորման եւ այլ հարցերի շուրջ։
Տեղին էր նաեւ Սիրիայի արյունալի իրադարձությունները տեսած սիրիահայ մի երիտասարդի ուղղած հռետորական հարցը, ով իր նախնիների վերապրած ցեղասպանության կրկնությունն էր տեսել, այս անգամ՝ 21-րդ դարում, որովհետեւ չի դատապարտվել առաջինը։
Վկայակոչվեց ու որպես Հայոց ցեղասպանության մասին արժանահավատ վկայություններ պարունակող կարեւոր աղբյուր մատնանշվեց նաեւ դեսպան Մորգենթաուի հեղինակությամբ 1918-ին լույս տեսած, 1919-ին հայերեն թարգմանված եւ վերջերս վերահրատարակված «Դեսպան Մորգենթաուի պատմությունը» գիրքը։ Հայտնի է, որ Մորգենթաուն դատապարտել է հայերի ցեղասպանությունը՝ որպես «ցեղի ոչնչացման արշավ»։
Մեծ դիվանագետի ծոռնուհու խոսքում կար հորդոր՝ հայ-թուրքական խնդիրներում սառույցը տեղից շարժելու համար, չմոռանալով տեղի ունեցածը, հարաբերություններում պահպանել հանդարտություն եւ հավասարակշռություն։