ՀՀ կրթության եւ գիտության նախարար Արմեն Աշոտյանն այսօր աշխատանքային հանդիպում է ունեցել Երեւանում չինարենի խորացված ուսուցմամբ վարժարանի ծրագրի աշխատանքային խմբի հետ: Հանդիպմանը մասնակցել է նաեւ աշխատանքների իրականացման ընթացքին հետեւելու նպատակով Երեւան ժամանած Չինաստանի Ժողովրդական Հանրապետության առեւտրի նախարարության միջազգային տնտեսական համագործակցության գործադիր բյուրոյի ղեկավարը:
Աշխատանքային խումբը նախարարին տեղեկացրել է, որ ավարտական փուլում են դպրոցի նախագծային աշխատանքները, զուգահեռաբար ընթացքի մեջ են տարածքում գտնվող նախկին դպրոցի շենքի ապամոնտաժման աշխատանքները, այժմ նախապատրաստվում է կառուցապատման ծրագրի պայմանագիրը, որը կողմերը կվավերացնեն առաջիկայում:
Կարեւորելով չինական դպրոցի ծրագրի նշանակությունը՝ կրթության, մշակույթի ոլորտում հայ-չինական հարաբերությունենրի ամրապնդման տեսանկյունից, նախարար Արմեն Աշոտյանը գուհունակությամբ արձանագրել է, որ չինական կողմը հետեւողականորեն իրագործում է ստանձնած պարտավորությունները: Միաժամանակ նախարարը հավաստիացրել է, որ հայկական կողմը եւս աշխատանքների կազմակերպման ընթացքում առաջացած բոլոր խնդիրներին պատրաստ է օպերատիվ լուծումներ տալ: Կողմերն ընդգծել են, որ անհրաժեշտ է համատեղել ջանքերը, որպեսզի չինարենի խորացված ուսուցմամբ վարժարանի կառուցապատման աշխատանքները մեկնարկեն հնարավորինս սեղմ ժամկետներում:
Հանդիպման ընթացքում անդրադարձ է եղել նաեւ նախագծի տեխնիկական եւ կազմակերպչական այլ հարցերի: