Ընդմիջումից հետո իրենց գործունեությունը վերականգնած շրջանառության հարկ վճարողները չպետք է անցնեն ԱԱՀ-ի դաշտ։ Այս մասին ասված է «Շրջանառության հարկի մասին» օրենքում փոփոխությունների նախագծում, որը կազմել է ԲՀԿ պատգամավոր Միքայել Մելքումյանը, եւ որը քննարկման է դրվել ապրիլի 21-ին կայացած նիստում։

Գործող օրենսդրությամբ բոլոր ռեզիդենտ համարվող առեւտրային ընկերությունները կամ մասնավոր անձինք կարող են ԱԱՀ-ից անցում կատարել շրջանառության հարկի, եթե մինչեւ փետրվարի 20-ը տարածքային հարկային մարմիններ ներկայացնեն համապատասխան հայտարարություն։  Սակայն այն դեպքում, եթե նախորդ տարի ընկերությունը դադարեցրել է գործունեությունը եւ վերականգնել է փետրվարի 20-ից հետո, ապա եկամտահարկով աշխատել այլեւս չի կարող, անգամ եթե ապրանքաշրջանառությունը չի գերազանցում ԱԱՀ-ի շեմը (58.35 մլն դրամ)։ Օրինագիծը նպատակ ունի տարածել  շրջանառության հարկը նաեւ նման ընկերությունների վրա։