Թուրքիայի վարչապետ Ահմեդ Դավութօղլուի՝ 1915-ի հետ կապված ուղերձում անկեղծություն չկար, ավելին նա 1915-ը ցեղասպանություն անվանողներին մեղադրեց խտրականություն անելու եւ ատելություն սերմանելու մեջ։ NEWS.am-ի թղթակցի հետ զրույցում նման տեսակետ հայտնեց թուրքագետ Անդրանիկ Իսպիրյանը։
Թուրքագետը նշեց, որ Դավութօղլուի ուղերձը գրեթե կրկնում էր Ռեջեփ Թայիփ Էրդողանի նախորդ տարվա ապրիլի 24-ից առաջ արված ուղերձը։
«Ուղերձում չկար նոր բան, իսկ հինն էլ ամբողջությամբ կեղծ էր։ Էրդողանի ուղերձից հետո անցել է մեկ տարի եւ արդեն հստակ է, որ ուղերձում նշված որեւէ կետ չի համապատասխանել իրականությանը։ Դավութօղլուն կրկին փորձում է մոլորեցնել։ Նա իր ուղերձում նշում է, թե ինչպես ամբողջ աշխարհում, Պոլսո հայոց պատրիարքարանն ապրիլի 24-ին հիշատակելու է մահացած օսմանցի հայերի հիշատակը, սակայն սա սուտ է։ Պոլսո հայոց պատրիարքարանը չի մասնակցում աշխարհի հայկական եկեղեցիներում Հայոց ցեղասպանության զոհերի հիշատակին իրականացվող արարողությանը, այլ ընդամենը ապրիլի 24-ին պատարագ է մատուցելու «ընդհանուր ցավի» համար»-նշեց Իսպիրյանը։
Թուրքագետը շեշտեց, որ Դավութօղլուի այսպես ասած «ցավակցական» ուղերձն այս տարի դարձել էր ավելի շատ մեղադրական դատավճիռ 1915-ը ցեղասպանություն անվանողների համար։
«Դավութօղլուն պնդել է, թե տեղի ունեցածը ցեղասպանություն ասելը ատելության սերմանում է եւ խտրականություն է ցավերի միջեւ»,-հիշեցրեց Իսպիրյանը՝ շեշտելով, որ Դավութօղլուի ուղերձում կրկին զոհն ու մարդասպանը նույն հարթության վրա էին դրվել, իսկ ուղերձն էլ ոչ թե ապրիլի 24-ի նախօրեին, այլ օրեր առաջ է արվում, ինչը պայմանավորված է Ցեղասպանության ճանաչման զարգացումներում թուրքական կողմի անհանգստությամբ։