Երեխայի վրա գորիլլայի հարձակումը ցնցել է համացանցի օգտատերերին: Հինգ օրվա ընթացքում YouTube-ում հրապարակված տեսանյութը շուրջ 16 մլն մարդ է դիտել:
Կարճ տեսահոլովակը նկարահանել են կենդանաբանական այգիներից մեկում: Երեխաները ծնողների հետ ապակու միջով հետեւում են գորիլլաներից: Իսկ մի փոքրիկ աղջիկ որոշում է նմանակել խոշոր կապիկին եւ կատակով բռունցքներով հարվածում է կրծքին:
Այդ խաղը, ամենայն հավանականությամբ, դուր չի գալիս գորիլլային: Կենդանին կտրուկ բարձրանում է տեղից եւ վազում հավաքվածների ուղղությամբ: Նա ցատկում է ապակու վրա, բայց այն, բարեբախտաբար, չի կոտրվում: Վախեցած երեխաները փախչում են տարածքից: