Թուրքիայի վարչապետ Ահմեդ Դավութօղլուի հայտարարությունը ոչ մի բովանդակություն չի պարունակում, դրանից երեւում է Թուրքիայի ժխտողական քաղաքականության հետեւողականությունը: Այս մասին NEWS.am-ի թղթակցի հետ զրույցում ասաց ԱԺ ՀԱԿ խմբակցության պատգամավոր Լյուդմիլա Սարգսյանը:
Նա նշեց, որ այդ հայտարարությունը սպասելի էր, ոչ մի զարմանալի բան չկար, տպավորություն էր, թե մի փոքր մեղմված տարբերակով են մոտենում ժխտողականությանը, բայց դա ոչինչ չի փոխում հայ-թուրքական հարաբերություններում եւ Ցեղասպանության ճանաչման գործընթացում Թուրքիայի դիրքորոշման մեջ:
«Կարող ենք կարդալ եւ առաջ անցնել, մենք ուղիղ գնում ենք մեր նպատակներին, աշխարհն այսօր այլ ընկալում ունի, այն փոխվել է, մեր ուղղությունը՝ Ցեղասպանության համաշխարհային ճանաչման հասնելն է: Թուրքիան, որքան էլ հզոր պատկերացնի իրեն, չի կարող չառերեսվել Օսմանյան կայսրության կողմից կատարված հանցագործության հետ, նա պարտադրված է դա ճանաչելու: 100 տարի սպասել ենք, մի քանի տարի էլ կարող ենք պայքարել»,-ասա պատգամավորը:
Նա հույս հայտնեց, որ Ցեղասպանության 100-րդ տարելիցին նվիրված միջոցառումները այսքանով չեն ավարտվի եւ սկսված գործընթացը, որի արդյունքն արդեն նկատելի է աս օրերին, շարունակություն կունենա, իշխանությոններն էլ գոնե այս հարցում հետեւողականություն կցուցաբերեն:
Պատգամավորը հույս հայտնեց, որ մի օր գուցե Թուրքիան փոխի իր վերաբերմունքը եւ քաղաքականությունը Հայաստանի եւ ԼՂՀ-ի նկատմամբ, «կապրենք, կտեսնենք»: