Թուրքիայի վարչապետ Ահմեդ Դավութօղլուի հայտարարությունը որեւէ գին չունի, դրանով նա փորձում է իր անձնական դեմքը փրկել, ոչ Թուրքիայի: Այս մասին NEWS.am-ի թղթակցի հետ զրույցում ասաց ԱԺ «Ժառանգություն» խմբակցության պատգամավոր Թեւան Պողոսյանը:
Նա նշեց, որ Թուրքիան իր անկախության 24 տարիերի ընթացքում Հայաստանի հանդեպ վարել է ապրիլյան դիվանագիտություն, այսինքն՝ ապրիլի 24-ին ընդառաջ ինչ-որ գործողություններ, փափուկ հայտարարություններ է անում՝ փորձելով աշխարհին ցույց տալ, թե տեսեք, մենք կողմ ենք հաշտության, իսկ ապրիլի 24-ից հետո մոռանում է այդ մասին եւ վարում կոշտ, նախապայմաններով քաղաքականություն, այդպես անցնում է մեկ տարի եւ նորից նույնը: «Քանի որ այլեւս հնարավոր չէ նույն պարզ մեսիջով ամեն անգամ աշխարհին դիմել, Թուրքիան սկսում է այլ գործողություններ անել, եկանք հասանք նրան, որ արձանագրություններ ստորագրվեց, բայց կյանքի չկոչվեց: Այն, ինչ այսօր իրենք անում են, կրկնոթյունն է: Կարծում եմ՝ Թուրքիայի հետ կվարվեն այնպես, ինչպես իրենք են վարվում մյուսների հետ, այսինքն՝ երբ մի ականջով մտնում, մյուսով դուրս է գալիս»,-ասաց պագամավորը:
Թեւան Պողոսանի գնահատմամբ՝ սա հայտարարություն է, որում նշված բառերը եթե Դավիթօղլուի շուրթերից չհնչեին, ապա կարելի էր խորը մտածել դրանց շուրջ, բայց մի մարդ, որը ունեցել է հնարավորություն իր ասածները կյանքի կոչելու եւ իրագործելու, բայց ոչինչ չի արել, նախապայմաններ է առաջ բերել, այլեւս որեւէ վստահություն չի ներշնչում:
Պատգամավորը շեշտեց, որ սա որեւէ գին չունեցող հայտարարություն է, որով Դավիթօղլուն փորձում է իր դեմքը փրկել անձնական իմաստով, ոչ Թուրքիայի: Նա նշեց, որ շատ ուրախ է, եթե Թուրքիան փորձում է ասել, որ փոփոխություններ են լինում, բայց նույն նժարով չես կարող չափել պատերազմը եւ Ցեղասպանությունը, պատերազմի արդյունքում Թուրքիային մնացել է մի մեծ պետություն, իսկ Ցեղասպանության արդյունքոմ մենք կորցրել ենք երկիր, հող, գենետիկ բալանս:
Նա հավելեց, որ եթե իսկապես Թուրքիան ցանկանում է քայլ անել, ապա մինչեւ ապրիլի 24-ը դեռ երկու օր ժամանակ կա, կարող է հայտարարել, որ բացում է սահմանը ՀՀ-ի հետ, հաստատում է դիվանագիտական հարաբերություններ,այդ ժամանակ կհավատան հայտարարությանը:
