Ազգությամբ հայ մոտ երեք տասնյակ բայքերներ աշխարհի տարբեր երկրներից մոտոցիկլետներով Հայաստան են ժամանել՝ մասնակցելու Ցեղասպանության 100-ամյա տարելիցի միջոցառումներին։ ԱՄՆ-ից, Լիբանանից եւ Գերմանիայից ժամանած բայքերներին միանալու են նաեւ հայաստանցի բայքերները, որոնք ապրիլի 24-ին մոտոցիկլետներով գնալու են Ծիծեռնակաբերդի հուշահամալիր՝ հարգանքի տուրք մատուցելու 1,5 մլն զոհերի հիշատակին։
«Մտահղացումը ծնվել է դեռ մի քանի տարի առաջ։ Ընկերներով որոշեցինք, որ 100-ամյա տարելիցին լինենք Հայաստանում։ Մեր մոտոցիկլետներն ուղարկել էինք Միլան, իսկ մենք մարտի 30-ին բոլորս հավաքվեցինք Միլանում, որտեղից օրական վեց ժամ մոտոցիկլ վարելով՝ հասանք Հունաստան, հետո Բուլղարիա, ապա Վրաստան։ Ճանապարհների վիճակը գնալով ավելի վատն էր դառնում, բայց մենք որոշել էինք եւ մեր նպատակից հետ չկանգնեցինք»,- NEWS.am-ին պատմեց Լոս Անջելեսից ժամանած Պերճ Գասպարյանը։
Նրա խոսքով՝ ճանապարհին իրենք իրենց հանդիպած բոլոր մարդկանց պատմել են Հայաստանի եւ Ցեղասպանության մասին։ Գերմանիայում ոմանք նույնիսկ ցանկացել են միանալ խմբին, սակայն չեն կարողացել, քանի որ խումբը միայն բայքերներից է կազմված։
Ապրիլի 28-ին բայքերները կհեռանան Հայաստանից, բայց արդեն օդանավերով։
