Թուրքիան պետք է վերջապես օգտագործի «ցեղասպանություն» եզրույթը եւ դադարեցնի ժխտողական քաղաքականությունը: Մի ամբողջ դար անց այդ վիրավորանքը պետք է դադարեցնել: Այս մասին NEWS.am-ի թղթակցի հետ զրույցում հայտարարեց Եվրախորհրդարանի ֆրանսիացի պատգամավոր Միշել Ռիվասին:
Նրա խոսքով, Հայոց ցեղասպանության 100-րդ տարելիցի առիթով Եվրախորհրդարանի ընդունած բանաձեւը կարեւոր քայլ է մի քանի պատճառներով: «Նախ՝ դա խորհրդարանների մակարդակով Հայոց ցեղասպանությունը ճանաչելու կոչ է եվրոպական երկրներին, ինչպես դա 1987 թվականին արել է Եվրախորհրդարանը, եւ ինչպես դա արել է Ֆրանսիան 2001 թվականին՝ իմ լոբբինգի ազդեցությամբ, երբ ես Ֆրանսիայի խորհրդարանի անդամ էի: Երկրորդ, դրանով Թուրքիային կոչ է արվում օգտագործել «ցեղասպանություն» եզրույթը: Հայոց ցեղասպանությունը ճանաչելով՝ Թուրքիան միայն կշահի»,- ընդգծեց Միշել Ռիվասին:
Եվ երրորդը, ըստ պատգամավորի, այն Հայաստանին եւ Թուրքիային հաշտեցման, դիվանագիտական հարաբերություններ հաստատելու եւ սահմանները բացելու կոչ է պարունակում: Ըստ Ռիվասիի, դա բխում է ոչ միայն երկու երկրների, այլեւ Եվրամիության շահերից:
«Ապրիլի 12-ին Հռոմի Պապի մատուցած պատարագից հետո մենք իմացանք, որ Գերմանիան նույնպես պատրաստ է ճանաչել Հայոց ցեղասպանությունը: Հույս ունենք, որ բազմաթիվ երկրներ կհետեւեն այդ օրինակին: Մեր ճանաչման շնորհից կկարողանանք ազդել Թուրքիայի ժխտողական քաղաքականության վրա»,- ամփոփեց Միշել Ռիվասին:
Հիշեցնենք, որ ապրիլի 15-ին Եվրախորհրդարանը ձայների մեծամասնությամբ Հայոց ցեղասպանության մասին բանաձեւ ընդունեց, որում Թուրքիային կոչ է արվում 1915 թվականի իրադարձությունները որպես ցեղասպանություն ճանաչել, առերեսվել անցյալի հետ եւ շարունակել ջանքեր գործադրել՝ հայ եւ թուրք ժողովուրդների իրական հաշտեցման ուղղությամբ:
