Հայաստանն առաջատար դիրք է գրավում ցեղասպանությունների կանխարգելման գործում։ Այդ մասին Երեւանում ընթացող Ընդդեմ ցեղասպանության հանցագործության» երկօրյա գլոբալ ֆորումի ընթացքում ասել է Միջազգային քրեական դատարանի դատախազ Լուիս Մորենո Օկամպոն։
Նրա խոսքով, «ցեղասպանություն» եզրույթը առաջացավ հոլոքոստից հետո։ «Մենք չենք սիրում մտածել ցեղասպանության մասին, չենք սիրում դիտել սարսափների կադրերը։ Ես երախտապարտ եմ Հայաստանին, որ առաջատար դիրքեր է գրավում ցեղասպանությունների կանխման իմաստով։ Դա ոչ միայն թույլ կտա տեսնել, թե ինչ է կատարվել 100 տարի առաջ, այլեւ այն, թե ինչ է կատարվում հիմա»,- նշել է Օկամպոն։
Նա նկատել է, թե մինչ օրս շատ դժվար է կանխել այս հանցագործությունը։ «Կա միջազգային դատարան, որը ասում է, թե Ռուանդայում ցեղասպանություն է ընթանում, բայց միեւնույն է, մենք չենք կարողանում կանխել այդ հանցագործությունը։ Սիրիայում, Իրաքում այժմ էլ ցեղասպանություն է ընթանում։ Ոսւտի նման միջոցառումն այսօր շատ արդիական է»,- ասել է Օկամպոն։
Նշենք, որ Երեւանում ընթանում է «Ընդդեմ ցեղասպանության հանցագործության» երկօրյա գլոբալ ֆորումը՝ նվիրված Հայոց ցեղասպանության 100-րդ տարելիցին։
Ֆորումի ընթացքում քննարկվելու են միջազգային իրավունքում մարդկության հանդեպ հանցագործությունների կանխարգելման միջոցների զարգացմանը, ցեղասպանությունների հետեւանքների վերացմանը եւ պատասխանատվության խնդիրներին վերաբերող հարցեր:
Նախատեսվում է խորհրդարանականներն ընդդեմ ցեղասպանության լիագումար նիստ, որի ընթացքում ելույթներով հանդես կգան խորհրդարանական պատվիրակությունների ներկայացուցիչներ:
Ֆորումին մասնակցում է մոտ 600 մասնակից՝ հինգ տասնյակ երկրներից։