Հայաստանի նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումները համակարգող Վիգեն Սարգսյանը չի մեկնաբանել Սպիտակ Տան որոշումը, ըստ որի՝ նախագահ Օբաման իր ապրիլքսանչորսյան ուղերձում չի ասելու «ցեղասպանություն» բառը։
Երեւանում ընթացող «Ընդդեմ ցեղասպանության հանցագործության» երկօրյա գլոբալ ֆորումի շրջանակներում լրագրողների հետ զրույցում Վիգեն Սարգսյանը ասել է. «Չեմ կարող մեկնաբանել մի հայտարարություն, որը դեռ չի հնչել։ Երբ լինի, այդ ժամանակ էլ կխոսենք այդ հայտարարության մասին»։ Նա միաժամանակ նշել է, թե Միացյալ Նահանգներից Հայաստան է այցելելու նախագահական պատվիրակություն՝ ֆինանսների նախարար Ջեյկոբ Լյուի գլխավորությամբ, այսինքն՝ ԱՄՆ-ը բավական ներկայացուցչական կազմով է մասնակցելու Հայոց ցեղասպանության 100-րդ տարելիցի միջոցառումներին։
Դիտարկմանը, թե Թուրքիան հատուկ պատվիրակություն էր ուղարկել Միացյալ Նահանգներ՝ իրենց դիրքորոշումը հայտնելու համար, Վիգեն Սարգսյանը պատասխանել է. «Դրա մեջ չ մի նոր բան չեմ տեսնում, թուրքական պատվիրակություններն ամենուրեք են, Գերմանիայում, Ավստրիայում եւ այլ տեղերում եւս կային, բայց դա չխանգարեց, որ շատ երկրներ ընդունեն ցեղասպանությունը դատապարտող բանաձեւեր, չխանգարեց Եվրախորհրդարանին անել իր քայլը»։
Ըստ Սարգսյանի, թուրքերի պահվածքի մեջ միշտ տեսնում ենք ժխտողականության միտում, թացը չորի հետ խառնելու միտում։ Թուրքական իշխանությունները փորձում են հանցագործին զոհի հետ նույն նժարին դնել՝ ասելով, թե հայերի հետ կատարվածը եղել է պատերազմի հետեւանքով։ «Շատերն ասում են, թե ցեղասպանություն տերմինը գոյություն չի ունեցել, ուստի դա ցեղասպանություն չէ, բայց Հոլոքոսթի ժամանակ էլ եզրույթը չի եղել։ Ռաֆայել Լեմկինը, որը տվել է ցեղասպանության սահմանումը, ասել է, որ դա այն է, ինչ կատարվեց հայերի հետ Առաջին, իսկ հրեաների հետ՝ Երկրորդ աշխարհամարտում»,- ամփոփել է Վիգեն Սարգսյանը։
