Եթե Թուրքիան ուզում է ունենալ ազատ հասարակություն, պարտավոր է ընդունել եւ ճանաչել Հայոց ցեղասպանությունը: Այս մասին այսօր՝ ապրիլի 22-ին, NEWS.am-ին ասաց Հայաստանի եվրոպացի բարեկամների կազմակերպության նախագահ Էդուարդո Լորենցո Օչոան:
Նա նշեց, որ Թուրքիայում այսօր արդեն շատ գիտնականներ եւ պրոֆեսորներ ընդունել են Ցեղասպանության փաստը:
«Շատ կարեւոր է, որ բոլորը հարգեն Հայոց ցեղասպանության զոհերի հիշատակը: Իմ կարծիքով՝ զոհերն արժանի են հիշատակման եւ ճանաչման: Հայոց ցեղասպանությունը 20-րդ դարի առաջին ցեղասպանությունն է եւ աշխարհն ամեն ինչ պետք է անի՝ խուսափելու նման ցեղասպանություններից»,- ասաց նա:
Նշենք, որ ապրիլի 22-23-ն Երեւանում ընթանում է «Ընդդեմ ցեղասպանության հանցագործության» գլոբալ ֆորում: