Ցեղասպանության 100-րդ տարելիցին նվիրված միջոցառումներին մասնակցելու նպատակով այսօր՝ ապրիլի 22-ին, Հայաստան ժամանեց հոգեւորականների լիբանանյան պատվիրակությունը՝ Մերձավոր Արեւելքի եկեղեցիների խորհրդի գլխավոր քարտուղար, քահանա Միշել Ջալաքի գլխավորությամբ:
«Մենք Հայաստանում ենք, որպեսզի 100-րդ տարելիցին զորակցենք հայկական եկեղեցուն եւ մասնակցենք հիշատակման այս կարեւոր միջոցառումներին»,- ասաց Միշել Ջալաքը:
NEWS.am-ի հետ զրույցում ՄԱԵԽ գլխավոր քարտուղարը նշեց, որ Հայոց Ցեղասպանության համաշխարհային ճանաչումը կարեւոր է պատմությունը վերակերտելու առումով:
«Շատ կարեւոր է մաքրագործել հիշողությունը, եւ դա անելու ճանապարհներից մեկը հայերի Ցեղասպանության ճանաչումն է, քանի որ անհրաժեշտ է ներկան ապրել խաղաղության մեջ, խաղաղություն, որը պետք է հաստատվի տարբեր երկրների եւ եկեղեցիների միջեւ»,- նշեց Ջալաքը:
