Ավստրալիան չի ճանաչում Հայոց ցեղասպանությունը, քանի որ այդ երկրում ուժեղ թուրքական լոբբի կա։ Այդ մասին NEWS.am-ի թղթակցի հետ զրույցում հայտարարել է Հարավային Նոր Ուելս նահանգի խորհրդարանի պատգամավոր Ամանդա Ռութ Ֆազիոն։
Նրա խոսքով, Ավստրալիայում մեծ թուրքական համայնք կա, որի ազդեցությունը երկրի կառավարության վրա զգալի է։
«Հպարտ եմ, որ Հարավային Նոր Ուելսի խորհրդարանը ճանաչեց Հայոց ցեղասպանությունը։ Ամեն տարի խորհրդարանում մենք Ցեղասպանության զոհերի հիշատակին նվիրված միջոցառում ենք անում։ Խորհրդարանի պուրակում հուշարձան կա՝ նվիրված Ցեղասպանության զոհերին»,- ասել է նա։
Ամանդա Ռութ Ֆազիոյի խոսքով, աշխարհասփյուռ հայությունը մեծ աշխատանք է տանում Ցեղասպանության միջազգային ճանաչման ուղղությամբ։