Մենք պետք է ընդունենք, որ մենք բոլորս, մարդ լինելով, նույնպես Հայոց ցեղասպանության զոհերն ենք դարձել։ Այս մասին ապրիլի 23-ին Երեւանում «Ընդդեմ ցեղասպանություն հանցագործության» գլոբալ ֆորումի ժամանակ հայտարարեց Լիբանանի խորհրդարանի պատգամավոր Հասան Մուհայբերը։
Նա նշել է, որ ինքը հայ չէ եւ հայ բարեկամներ չունի, սակայն կարծում է, որ շատ կարեւոր է ոչ միայն խոսել Հայոց ցեղասպանության մասին, այլ նաեւ գործել։ «Լիբանանը ընդունել է ցեղասպանություն վերապրածներին։ Այդ համայնքը մասնակցել է լիբանանյան պետության կայացման գործում։ Նրանք ցույց տվեցին, որ կարող են ստեղծագործ լինել եւ դա ապացուցում է, որ Օսմանյան կայսրությունը տապալել է իր պլանը»,- ասել է լիբանանցի պատգամավորը՝ հավելելով, որ հպարտ է լինել խորհրդարանի անդամ, որը միաձայն ընդունել է Հայոց ցեղասպանության ճանաչման բանաձեւը եւ հպարտանում է իր երկրով, որը 2015թ. ապրիլի 24-ը հայտարարել է սգո օր։
«Մեր պարտականությունն է հիշել պատմությունը, սակայն մենք պատմաբաններ չենք, մենք խորհրդարանի անդամներ ենք եւ ցանկանում ենք գրել ներկայի եւ ապագայի մասին։ Մենք պետք է խուսափենք Օսմանյան կայսրության սխալների կրկնությունից, քանի որ նա հիմա այլ անվան տակ է հանդես գալիս։ Մենք պետք է այնպես անենք, որ 20-րդ դարի առաջին ցեղասպանությունը չշարունակվի նաեւ 21-րդ դարում։ Պետք է վերջ դնենք ցեղասպանությանը, մենք խոսելու ժամանակ չունենք, ժամանակն է գործել»,- ասաց խորհրդարանականը։