Գերմանիայի նախագահ Յոահիմ Գաուկը Օսմանյան կայսրության տարածքում տեղի ունեցածը որակեց որպես ցեղասպանություն եւ միաժամանակ բարձրացրեց դրանում Գերմանիայի ունեցած մեղքի բաժնի հարցը, գրում է Tagesspiegel-ը։

Բեռլինի մայր տաճարում ցեղասպանության զոհերի հիշատակին նվիրված  էկումենիկ աղոթքից հետո նախագահն իր ելույթում ասել է հետեւյալը. «Այս դեպքում մենք՝ գերմանացիներս, պետք է կոլեկտիվ պատասխանատվություն կրենք եւ անգամ գիտակցենք մեղքի մեր բաժինը Հայոց ցեղասպանության մեջ»,- հայտարարել է Գաուկը նկատի ունենալով Գերմանական կայսրության զինվորականներին, որոնք մասնակցել էին հայերի տեղահանություններին։

Գաուկը բառացի մեջբերել է ապրիլի 24-ին Բունդեսթագում քվեարկության դրվելիք որոշման տեքստը. «Մեր այսօրվա գիտակցության եւ  անցյալ դարի քաղաքական եւ հումանիտար ողբերգությունների ֆոնին այսօր ավելի քան պարզ է, որ հայերի ճակատագիրը զանգվածային սպանությունների, էթնիկ զտումների, տեղահանությունների եւ այո, ցեղասպանությունների օրինակ է, որոնցով այդպես սարսափելի կերպով նշանավորվեց 20-րդ դարը»։