Կանադական Journal de Montreal թերթի թղթակից Ֆրանսուա Բուգինյուն նկարագրել է ֆրանսահայերի հետ Փարիզից Երեւան թռիչքի մասին:
«Ինքնաթիռի մեջ աղմուկը շատ է: Իմ առաջ ֆրանսիական ռադիոյի հայտնի վարող է: Մի փոքր հեռու` պատգամավոր Պատրիկ Դեւեջյանն է, նա ձեռք է սեղմում եւ լուսանկարվում: Հայերին տարբերելը հեշտ է. նրանց աչքերը փայլում են հիացմունքից:
Բոլորն ինձ կրկնում են, որ ժամանակը բաժանվել է Ֆրանսցիսկոս պապի արտահայտությունից «առաջ» եւ «հետոյի»: Անցած շաբաթվա վերջում պապը դիվանագիտական սկանդալի հեղինակ էր դարձել` Թուրքիային կոչ անելով ճանաչել Հայոց ցեղասպանությունը: Հարեւանիս խոսքով` Ֆրանցիսկոսի խոսքերը կարելի է համեմատել Հովհաննես Պողոս 2-րդի հայտնի «Մի վախեցեք, բացեք դռները Քրիստոսի առաջ» արտահայտության հետ: «Ֆրանցիսկոսը արթնացրեց մեր վճռականությունը...»:
Դրանից հետո խոսում են այն մասին, թե ով եւ որտեղից է սատարում հայերին: Գովաբանում են Կանադային: Ֆրանսիան հավատարիմ եւ հաստատակամ է, բացի այդ ուրբաթ Երեւան է ժամանում Օլանդը: Գերմանիան չպետք է դանդաղի ճանաչման գործում: Ռուսաստանը Պուտինի հետ միասին շաբաթվա եւս մեկ հերոսն են...
Այդուհանդերձ, քիչ առաջնորդներ են մեկնում Հայաստան: Պատճառը ճանաչման դեմ Թուրքիայի հզոր ճնշումն է: Օրերս նախագահ Օբաման ԱՄՆ հայ համայնքի ղեկավարներին հայտարարել էր, որ «ցեղասպանություն» եզրույթը հնչեցնելու մտադրություն չունի: Սա վերջինիս 2008թ. նախընտրական արշավից մեկ քայլ հետ էր եւ հայերի կողմից այն ընկալվեց` որպես ճշմարտության ժխտում եւ դավաճանություն:
Երեւանի օդանավակայանում հարյուրավոր կամավորներ դիմավորում են Ցեղասպանության 100-րդ տարելիցը լուսաբանելու նպատակով Հայաստան ժամանած օտարերկրացիներին: Մենք չենք մոռանում մեր ընկերների մասին», - ասում են նրանք` հիշելով Օբամայի «վախկոտության» մասին: