Ողջ մարդկությունը պետք է ճանաչի հայոց ցեղասպանությունը: Եթե մարդիկ ճիշտ կերպով հասկանային, թե ինչ է տեղի ունեցել Ցեղասպանության տարիներ, ապա հավանաբար Երկրորդ աշխարհամարտը չէր լինի: Ռուսաստանի հայերի միության կողմից պատրաստված տեսանյութում նման կարծիք է հայտնել Ռուսաստանի ժողովրդական արտիստ Ալեքսանդր Կորշունովը:
«Ես գիտեմ, որ առ այսօր ոչ բոլորն են ճանաչում Հայոց ցեղասպանության փաստը: Իհարկե, անհրաժեշտ է, որպեսզի այն ճանաչի ողջ մարդկությունը, որպեսզի հետագայում այն չկրկնվի», - ասել է նա:
Տեսանյութում մի շարք ռուս դերասաններ խոսում են Ցեղասպանության նկատմամբ իրենց վերաբերմունքի, համերաշխություն են հայտնում հայ ժողովրդին եւ դատապարտում են Թուրքիայի ժխտողական քաղաքականությունը: Դերասաններրի թվում են Ռուսաստանի ժողովրդական արտիստներ Սերգեյ Կորշունովը, Ալեքսանդր Գոլոբորոդկոն, վաստակավոր արտիստներ Ալեքսանդր Սեմչեւն եւ Օլգա Կաբոն, Մուխտար Գուսենգաջիեւը, Ալեքսանդր Տյուտինը:
«Սարսռում ես այդ գազանության մասշտաբներն հիշելիս», - ասում է Մուխտար Գուսենգաջիեւը:
Ռուսաստանի ժողովրդական արտիստ Ալեքսանդր Գոլոբորոդկոն, իր հերթին, նշում է, որ չի հասկանում, թե ինչն է խանգարում թուրքական հասարակությանն ու իշխանություններին ներողություն խնդրել հայերից: «Այդքան էլ լավ չեմ հասկանում, թե ինչ է տեղի ունենում եւ ինչո՞ւ են թուրքերն այդպես դիմադրում», - ասում է նա:
Վաստակավոր արտիստ Ալեքսանդր Սեմչեւը նկատում է, որ թուրքերին հավանաբար ձեռնտու չէ ճանաչել այդ փաստը, այո «ոչ գեղեցիկ գործերի մեջ» մեղքը խոստովանելը բարդ է, ավելի հեշտ է հայացքը հեռացնել: «Կան փաստեր՝ ի՞նչ կա չճանաչելու: Ներողություն խնդրեք, տղամարդկություն եւ քաջություն ունեցեք», - նշում է Սեմչեւը: