Եվրոպայի խորհրդի անդամ-երկրների միջեւ հակամարտության հարցերով ենթակոմիտեն կդառնա ավելորդ գումարների վատնման վայր՝ առանց որեւէ արդյունքի։ Այս մասին NEWS.am-ի թղթակցի հետ զրույցում ասաց ԱԺ «Ժառանգություն» խմբակցության պատգամավոր Թեւան Պողոսյանը։
Նա նշեց, որ կան կառուցյներ, որոնք փորձում են զբաղվել կոնֆլիկտներով եւ այդ ընթացքում չունեն որեւէ հաջողված փորձ, փոխարենը կան երկրներ, անձինք, որոնք հայտնի են իրենց դրական փորձով, օրինակ՝ ՄԱԿ-ը, ԵԱՀԿ-ն։ «Ես չեմ լսել, որ ԵԽԽՎ-ն զբաղվի կոնֆլիկտներով եւ ունենա հաջողված փորձ։Դրա համար, կարծում եմ, որ հատուկ կոմիտե ձեւավորելը անիմաստ է, ունեն տարբեր հարցերով շրջանների վարչություններ, որոնք տարբեր երկրներից գումարներ են ստանում եւ կարող են ներգրավվել տարբեր ծրագրերում։ Դա անիմաստ ինստիտուտի ձեւավորում է, մինչեւ հիմա ԵԽԽՎ-ն չի փայլել վստահությամբ, որ կոնֆլիկտի կողմերը դիմեն իրենց եւ ասեն, որ եկեք, օգնեք մեզ»,-ասաց Թեւան Պողոսյանը։
Պատգամավորը նշեց, որ վստահելի ինստիտուտ դառնալու համար ԵԽԽՎ-ն ունի երկար ճանապարհ, եւ երբ դա լինի, դրանից հետո միայն կկարողանա ինչ-որ չափով օգտակար լինել կոնֆլիկտների լուծման ճանապարհին։ Թեւան Պողոսյանը վստահ է, որ այս կառույցը ապագայում կապացուցի իր ոչ կենսունակությունը՝ դառնալով ավելորդ գումարների վատնման վայր առանց արդյունքների։
Նշենք, որ Եվրոպայի խորհրդի խորհրդարանական վեհաժողովում (ԵԽԽՎ) կստեղծվի Եվրոպայի խորհրդի անդամ-երկրների միջեւ հակամարտության հարցերով ենթակոմիտե: Այն հիմնականում կզբաղվի Ղարաբաղյան, Հյուսիսային Օսիայի եւ Աբխազիայի, հյուսիսային Կիպրոսի, Մերձնեստրի եւ Ղրիմի հակամարտություններով, ինչպես նաեւ Ղրիմի եւ Ուկրաիային իրավիճակի հետ կապված հակամարտությամբ:
