Լեռնային Ղարաբաղի «Հայ բարեկամների միավորման» մի խումբ երիտասարդներ ոտքով ԼՂՀ-ից հասել են Երեւան՝ իրենց հարգանքի տուրքը մատուցելու Ցեղասպանության զոհերի հիշատակին:
«Մենք Լեռնային Ղարաբաղի Հանրապետությունից ենք: Ղարաբաղից Ծիծեռնակաբերդի հուշահամալիր ենք եկել ոտքով: Մենք որոշեցինք քայլել եւ զգալ այն ֆիզիկական ցավը, որն զգացել են 1,5 մլն հայերը, որոնք տեղահանվեցին իրենց բնօրրաններից: Չեմ կարող նկարագրել, թե հոգեւոր ինչ զգացողություններ ենք ունեցել»,-NEWS.am-ի թղթակցի հետ զրույցում նշել է «Հայ բարեկամների միավորում» հ\կ նախագահ Սերգեյ Եփրեմյանը:
Նրա խոսքով, իրենք երթն սկսել են Մարտակերտի շրջանի Չափար գյուղից, անցել 450 կմ ճանապարհ՝ Չափար-Ստեփանակերտ- Լաչին-Գորիս-Էջմիածին-Երեւան ուղղությամբ:
«Մեր ճանապարհը տեւել է տասը օր: Առաջին կանգառը եղել է Էջմիածինը: Հասել ենք ապրիլի 23-ին, մասնակցել Սրբադասման արարողությանը եւ ճանապարհը շարունակել մինչեւ Ծիծեռնակաբերդ: Դժվարություններ շատ կային, մենք մեր մարմնի վրա զգացինք, թե ինչ դժվարություններ են տեսել մեր նախահայրերը տեղահանման ժամանակ: Բայց բոլորս ողջ եւ առողջ տեղ ենք հասել: Հոգնածություն ունեցել ենք, բայց այն մեզ չի խանգարել հասնել մեր նպատակին»,-ասել է նա: