Վառնայում ապրիլի 23-ին սկսվեցին Հայոց ցեղասպանության 100-ամյակի բուն միջոցառումները. Երեւանի ժամանակով ժամը 17:15-ին Վառնայի ս. Սարգիս եկեղեցում սկսվեց Մեծ եղեռնի զոհերի սրբադասման արարողության ուղիղ եթերով հեռարձակումը, որին հետեւում էին տասյակ հայորդիներ: Ժամը 19:15-ին եկեղեցում հնչեցին 100 գուժկան զանգեր, որից հետո Տ. Բարթուղիմեոս քահանա Հակոբյանը ներկաներին հակիրճ ներկայացրեց օրվա խորհուրդը:
Երեկոյան ժամը 20:00-ին, Բուլղարիայի հայերի միության նախաձեռնությամբ եկեղեցու բակից սկսվեց ջահերով երթ, որը Բուլղարիայում առաջին անգամ է կատարվում եւ աննախադեպ երեւույթ էր Բուլղարահայ համայնքի կյանքում:
Երթի մասնակիցները 100 վառված ջահերով քայլեցին Վառնայի փողոցներով եւ հասան մինչեւ Հայոց ցեղասպանության հուշարձան, որը գտնվում է Վառնայի քաղաքապետարանի հարեւանությամբ: Երթի ընթացքում մասնակիցները երգում էին շարականներ եւ հայրենասիրական երգեր:
Երթի մասնակիցները մոտ մեկ ժամ անց հասան Հայոց ցեղասպանության հուշարձանի մոտ: Այնտեղ Տեր Բարդուղիմեոսն իր խոսքում նշել է. «Մենք պետք է վստահ լինենք, որ Թուրքիան գլուխ պիտի խոնարհի մեր առաջ ու ներողություն պիտի խնդրի: Սա ոչ թե ողորմության պայքար է, այլ պահանջատիրության»:
Նշվել է, որ այս երթը բուլղարահայ համայնքում ավանդական է դառնալու:
Ներսես Կետիկյանը Բուլղարահայ համայնքի անունից իր հիասթափությունը հայտնեց ներկայիս Բուլղարիայի կառավարության վախկոտ քաղաքականությունից: «Քանի դեռ Բուլղարիայի կառավարությունը չի ճանաչել եւ դատապարտել Հայոց ցեղասպանությունը, չի կարող լինել քաղաքակիրթ աշխարհի լիարժեք մի մասնիկը: Եվրոպական Միության անդամ լինելը նշանակում է կիսել նրա արժեհամակարգը: Մինչդեռ ողջ Եվրոպան ճչում է Թուրքիայի երեսին, որպեսզի ընդունի Հայոց ցեղասպանությունը, Բուլղարիայի կառավարությունը պահպանում է քար լռություն եւ ամեն ինչ անում է, որպեսզի չնեղացնի իր հարավային հարեւանին: Սա մեծ ամոթ է, որի հետեւանքների կրողը եղբայրական բուլղար ժողովուրդն է, որի ազնիվ զավակները այս պահին մեր կողքին են»,- իր խոսքում նշեց Բուլղարիայի հայերի միության ներկայացուցիչը:
Երթին մասնակցում էին նաեւ բուլղար բարեկամներ, ովքեր իրենց համերաշխությունը հայտնեցին հայ ժողովրդին եւ նշեցին, որ ամոթ են զգում այն փաստից, որ Բուլղարիան տակավին չի ճանաչել Հայոց ցեղասպանությունը:
Նշենք, որ Վառնայի քաղաքապետարանի հարեւանությամբ գտնվող Հայոց ցեղասպանության հուշարձանը, որը ամբողջությամբ պատրաստված է Հայաստանում, կանգնեցվել է 2005 թվականին, Երեմ եւ Հարություն Հովսեփյաններ եղբայրների անձնական միջոցներով եւ ջանքերով: