Եվրախորհրդարանի ղեկավար Մարտին Շուլցը կոչ է արել հայերին ու թուրքերին առաջ ընթանալ երկխոսության ճանապարհով:
«Նպատակը լռությունը հաղթահարելն է եւ ոչ թե իրար մասին, այլ իրար հետ երկխոսելը: Միակ ուղին առաջընթացն է, ազնիվ երկխոսությունը հայերի ու թուրքերի միջեւ այն մասին, թե ինչ է նշանակում սարսափելի անցյալն այսօրվա համար եւ ինչպես հիշողությունը կարող է հանգեցնել երկու երկրների լավ հարաբերությունների ապագայում»,-գրել է Շուլցը Facebook-ի իր էջում:
Շուլցը հիշեցրել է, որ Եվրախորհրդարանը Երեւանում ներկայացնում է փոխվարչապետ Ռիչարդ Րարնեցկին եւ որ նախորդ շաբաթ Եվրախորհրդարանը Հայոց ցեղասպանության վերաբերյալ բանաձեւ է ընդունել:
«Ես հասկանում եմ, որ Հայաստանի ու Թուրքիայի միջեւ հաշտությունը բարդ գործընթաց է: Շատ վերքեր դեռ բաց են, շատ ձայներ դեռ պետք է լսվեն: Վերքերի սպիացման գործընթացը ժամանակ կպահանջի, բայց մենք չպետք է մոռանանք, որ վերջին տարիներին կարեւոր քայլեր են արվել հաշտության ու ճանաչման ուղղությամբ: Կարեւոր է շարունակել այն դրական ուղղությամբ»,-ասել է Եվրախորհրդարանի նախագահը:
Շուլցն ընդգծել է, որ լինելով ազգությամբ գերմանացի, ինքն ամեն օր բախվում է իր երկրի անցյալին եւ գիտի, թե որքան կարեւոր է պատմությունը: