Հայոց ցեղասպանության զոհերի հիշատակին Թուրքիայի Դիարբեքիր քաղաքում տեղի ունեցած սգո միջոցառման ժամանակ ելույթով հանդես են եկել Դիարբեքիրի քաղաքապետ Գյուլթան Քըշանաքը եւ քրդական «Ժողովուրդների դեմոկրատական» կուսակցության առաջնորդ Սելահաթին Դեմիրթաշը։
Ինչպես տեղեկացնում է Ստամբուլի հայկական «Ակոս»-ը, Դիարբեքիրի քաղաքապետ Գյուլթան Քըշանաքն իր խոսքում նշել է, որ հայ եղբայրները հայ ժողովրդի վերապրած ցավը, ցեղասպանությունը չմոռանալու համար պատրաստել են անմոռուկ։ «Մենք երբեք չենք մոռանա դա։ Տեղի ունեցած այդ ողբերգությունը, այդ կոտորածը, այդ ցեղասպանությունը մերս սրտի խորքում զգում ենք։ Չենք ուզում այդ ողբերգության հետ շարունակենք մեր ճանապարհը, արդեն ժամանակն է, որ մեր վերքերը ապաքինվեն։ Մենք պետք է կարողանանք հաջողության հասնել, որ առերեսվենք իրականության հետ։ Մենք դատապարտում են տեղի ունեցած ցեղասպանությունը»,-ասել է Դիարբեքիրի քաղաքապետը։
HDP-ի առաջնորդ Սելահաթին Դեմիրթաշն էլ նշել է, որ այս պահին անհրաժեշտ է, որ Ցեղասպանության մասին քննարկումները Թուրքիայում մի կողմ դնեն ու ամբողջ Թուրքիայում սուգ հայտարարեն։ «Շատ ցավալի է, երբ դիակը գետնին է գտնվում, սակայն քննարկում են, թե ինչպես է մահացել, կամ ինչպես է սպանվել»,-ասել է Սելահաթին Դեմիրթաշը։