Ռուսաստանի նախագահ Վլադիմիր Պուտինն արդեն մեկնել է Հայաստանից: Հայոց ցեղասպանության 100-րդ տարելիցի միջոցառումներին մասնակցելու նպատակով Հայաստան այցելած մյուս երեք երկրների նախագահները՝ Ֆրանսիայի նախագահ Ֆրանսուա Օլանդը, Սերբիայի նախագահ Տոմիսլան Նիկոլիչը եւ Կիպրոսի նախագահ Նիկոս Անաստասիադիսը եւս այսօր կմեկնեն Հայաստանից:
Նշենք, որ Հայոց ցեղասպանության 100-րդ տարելիցի արարողություններին մասնակցելու նպատակով Հայաստան են այցելել պաշտոնական պատվիրակություններ 60 երկրներից: Հյուրերի ընդհանուր թիվը հասնում է 600-ի: ԱՄՆ նախագահական պատվիրակությունը գլխավորել է ԱՄՆ ֆինանսների նախարար Ջեյքոբ Լյուն:
Արտերկրյա պատվիրակությունները գլխավորել են խորհրդարանների նախագահներ, վարչապետներ:
Երեւան են ժամանել նաեւ կրոնական կառույցների հոգեւոր առաջնորդներ, դիվանագիտական կորպուսի ներկայացուցիչներ, անվանի գիտնականներ, միջազգային կազմակերպությունների ներկայացուցիչներ:
Հայոց ցեղասպանության փաստը ճանաչվել է մի շարք պետությունների կողմից։ Առաջինը 1965թ. դա արեց Ուրուգվայը, որի օրինակին հետեւեցին Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուեալան, Արգենտինան եւ ԱՄՆ 42 նահանգ։
Հայոց ցեղասպանությունը ճանաչել է նաեւ Վատիկանը, Եվրախորհրդարանը, Եկեղեցիների համաշխարհային խորհուրդը։