Սիդնեյի քաղաքապետարանուն այսօր՝ ապրիլի 24-ի երեկոյան Հայոց ցեղասպանության 100-րդ տարելիցին նվիրված միջոցառում է տեղի ունեցել:
Ինչպես հաղորդում է NEWS.am-ի թղթակիցը Սիդնեյից, միջոցառմանը մասնակցել են բարձրաստիճան հյուրեր, այդ թվում Ավստրալիայի գանձապետ Ջո Հոքին, Նոր Հարավային Ուելս նահանգի վարչապետը, Հունաստանի դեսպանը, ՌԴ գլխավոր գյուպատոսը եւ այլք:
Միջոցառմանը ներկա է գտնվել 2200 մարդ: Ելույթներ են ունեցել Սիդնեյի օպերային թատրոնի մենակատար Նատալի Արոյանը եւ այլ երաժիշտներ:
Առանցքային իրադարձությունը եղել է հայտնի փաստաբան եւ իրավապաշտպան Ջեֆրի Ռոբերթսոնի ելույթը, ով ՄԻԵԴ-ի բարձրագույն պալատում «Դողու Փերինչեքն ընդդեմ Շվեյցարիայի» գործով ներկայացնում էր Հայաստանի շահերը:
Իր ելույթում նա հայտարարել է, որ Հայոց ցեղասպանության ապացույցներն ավելի շատ են, քան Հոլոքոստինը: Անդրադառնալով փաստին, որ Ավստրալիան մինչ օրս դաշնային մակարդակով չի ճանաչել հայոց ցեղասպանությունը, նա ասել է. «Միթե դա հեգնանք չէ: Մենք հպարտությամբ նշում ենք օրը, երբ հազարավոր երիտասարդ ավստրալացիներ ընդդիմացան թուրքական գնդակներին, իսկ այսօր կառավարությունը համարձակություն չունի դիմակայել թուրքական ճնշմանը»:
Բացի այդ, Ռոբերթսոնը նշել է, որ միայն ճանաչումը քիչ է, Թուրքիային պետք է պատերազմական տուգանքների պահանջ ներկայացվի, հակառակ դեպքում դա կմնա անպատիժ հանցագործություն: